Shillong, Naiwieng 16: U Myntri Rangbah ka jylla u Conrad K Sangma u la pynthikna ia ki nongthoh khubor ba ka sorkar kan sa pynbeit ia ki jingeh kiba la kdew ha ki dorkhas, kynthup ia ka jingpynheh ia ka mang tyngka bad ban pynbeit ryntih ia ka jingsiew ia ki jingpynbna paidbah (Advertisement).
Haba kren ha ka jingrakhe National Press Day ha Shillong Club, u Conrad u la ong ba ki kam kila iaid shaid ban pynbeit iaki mat jingdawa jong ki nongthoh khubor.
“Ngi lah ban nym lah ban pynbeit lut ia ki jingeh kiba phi don, hynrei nga tip ba ngi lah ban pynbeit katto katne napdeng ki mat jingdawa” la ong u Conrad.
“Ngi kmen ban kyrshan bad pynthikna ia ka jingbha jingmiat jong ki nongthoh khubor jong ngi, ka jingdonkam ban ai jinghikai pyntbit bad ka jingroi baroh kawei jong ka kam thoh khubor kan nangbha shuh shuh ha ki por ban wan,” u la bynrap.

Hynrei u la kyntu ïa ka Shillong Press Club bad ka MEPA ba kin wanrah ka jingkylla thymmai ïa ka kam thoh khubor kaba kham tbit bad ban pyniakhlad ïa lade naki social media khamtam naki Youtuber.
“Phim donkam ban ianujor ia lade bad ki YouTuber, la ong u Conrad, “To leit phai biang sha la ki tynrai bad to long kaei kaba phi sdang ha ka jingshisha.”
U la ai jingmut ban pynrung kyrteng iaki nongthoh khubor, ban ai da ki ID bad ka ba la pynskhem ban tei ia ka jingshaniah jong ki paidbah.
“Nga pyrkhat ba kane ka dei kaei kaei kaba phi lah ban leh, namar lada phi iai bteng ban ialeh pyrshah ia kaei kaba la don lypa, bad kiei kiei kiba kum kane ka fashion, kaba nga ianujor bad ki jain kiba phi phong, kata kam dei ma phi. Balei phin kwah ban long kumta? Leit phai biang sha la ki tynrai bad long kumba phi la sdang ha ka jingshisha,” ula ong.
“Ka don ka jingthrang ia ka jait khubor kiba shong nia bad kaba paka, Hato phi lah ban trei ia kata? Phi lah ban thaw ia kata? Bad katba ngi dang ialeh bad mareh lang bad kiwei khamtam haka juk teknoloji”.
Hashuwa kane u Myntri Rangbah u la kren shaphang ka rai jong u hi ban pynduna ïa ki tyndong jingsawa na ki prokram sorkar da kaba weng ïa ki jingkren pdiang sngewbha, ki jingkren ai khublei. “Nga la rai ba ha ki prokram jong nga, ban pynlong ïa kiei kiei kiba kham sted, nga donkam ban pynduna ïa ki tyndong jingsawa, kiei kiei kiba ha ka jingshisha kim don jingmut ei ei, bad ngi donkam ban sangeh noh ban leh ïa kiei kiei tang iaki jingdonkam”.

