Pasighat, Risaw 29: Ka jingïakhih pyrshah ïa ka jingthmu ban shna ïa ka Siang Upper Multipurpose Project (SUMP) kaba 11,200 MW ka la jur bha ha kylleng ka jylla Arunachal Pradesh ha ka sngi Palei, ha kaba ki nongïakhih, ki nongshong shnong bad kiba bun ki samla Gen Z ki la ïashim bynta ha ki jingïakhih ban dawa ban pynsangeh noh ïa kane ka projek bad ban pyllait noh ïa ki nongïakhih ba la shah kem.
Ki nongïakhih kiba phong da ki riam tynrai jong ki riewlum bad kiba rah ïa ki placard kiba la thoh “Pynsangeh noh mardor ïa ka Siang Upper Multipurpose Project” bad “Ym donkam Dam halor Siang” ki la ïaid lyngba ki surok, kaba la pynmih ïa ka jingsngewkhia halor ka jingthmu ban shna ïa ka projek pynmih bor ding kaba heh.
U nongmihkhmat jong ki samla uba la ialam ia katei ka jingialang u la ong ba ka jingdawa kaba kyrkieh ka long ban pyllait khlem kyndon pyrshah kiba la shah set bad ban weng noh ia ki mukotduma ba la mudui pyrshah ia ki.
“Ka jingdawa ba kongsan jong ngi ha kane ka jingiakhih mynta ka long ba dei ban pyllait noh ia kiba la shah set, bad kino kino ki mukotduma ba la mudui pyrshah ia ki la kumno kumno dei ban weng noh”, la ong u nongmihkhmat ha ki nongthoh khubor.
U nongiakhih u la batai ia kane ka jingiakhih kum ka jingiakhih kaba jai jai ban iada ia ki jaitbynriew trai ri bad ka lawei jong ki.U la kynnoh ba ka jingleh jong ki pulit ha ka jingiakhih kaba kham mynshwa ha Pasighat ka la pynlong ia ki katto katne ngut ki briew ban shah kem.
Ka jingkhihwin kaba mynta ka bud hadien ka jingshah set kaba ïadei bad ka jingpyrshah ïa ka pre-feasibility report (PFR) survey bad ki jingïakynad hadien kata.
Ha ka 9 tarik u Risaw, ka bor pyniaid District jong ka Upper Siang ki la hukum ban set phatok ia ki saw ngut ki nongshong shnong katkum ka Arunachal Pradesh Unlawful Activities (Prevention) Act, 2014.Kine ki dei kiba la tip kyrteng kum u Adum Tayom na ka shnong Kumku, u Omak Paron bad u Okut Paloh na ka shnong Ramku.La kynnoh ia ki da ka bor pyniaid district ba ki donkti ha ki kam kiba iadei bad ka jingpynthut ia ka suk ka sain kaba don sawdong jong ka rukom survey.
Ha ka 25 tarik u Risaw, la iathuh ba u anti-dam activist bad u nongiasaid ain ia ka human right u Ebo Mili, u nongialam ki samla u Otul Jerang bad u activist u Tajong Talom ki la don ha kti jong ki pulit hadien ka jingkulmar ha Pasighat.
Hadien kata, ki pulit ki la iathuh ba la kem ia 26 ngut ki briew, kynthup ia phra ngut ki khynnah rit, ha kaba iadei bad katei ka jingshah thombor ha ka por ba don ka jingshah khang shnong ha ka 23 tarik u Risaw.La kem ia 6 ngut kiwei pat ban tohkit, bad la register ia 8 tylli ki case.Ki case ki kynthup ia ki kam runar ba la kynnoh kum ka nongpyn kulmar, ka jingialang beain bad ka jingpynjot ia ki mar ki mata jong ki paidbah.Ia ka jinglong jingman jong ki khynnah rit ym shym la pynpaw.
La iathuh ba u Mili bad u Jerang ki la sdang ia ka jingshah thngan hapoh police custody ha ka 26 tarik u Risaw, ki bahaiing jong ki ruh ki la pynpaw ia ka jingsngewkhia halor ka koit ka khiah jong ki bad ki la kyntu ban ai ia ka jingsumar kaba biang.
“Ngi pynlong ia kane ka rally namar ba ka dei ka kam ban im ka jong ngi.Kam dei kumba ngi leh beain ia kane; baroh la leh katkum ka ain”, la ong uwei u nongiakhih, uba la khot ban pyllait noh ia kito kiba shah kem.
