Shillong, Risaw 09: Ka sorkar jylla kam pat khot iakren ia ki nongialam jongka All Meghalaya Sarva Shiksha Abhiyan School Teachers’ Association (AMSSASTA) watla ka dang don hapdeng jong ka jingiakhih da kaba shong kyllain mungor mynta la 8 sngi tam, ban pynbor ia ka sorkar ban pyntreikam noh ia ka jingkyntiew ia ka tulop jongki 13000 ngut ki nonghikai SSA.
Ha kaba pynpaw ia ka jingsngewkhia halor ka jingleh kuman jong ka sorkar jylla, u General Secretary ka Association u Bah Wanpyndaphi Lapang ula ong, “Kam shim la don kano kano ka jingkhot iakren halor ki mat jingdawa ki jong ngi wat hapdeng ka jingshisha ba ha ka sngi Thohdieng jong ka taiew bala dep u Nongaibuit jong ka tnad pule puthi u Bah HM Shangpliang ula wan jngoh ia ka jaka ba pynlong ia ka jingiakhih. Kam shim la don kano kano ka jingkhot iakren hynrei ngi dang iai ap”.
U Bah Lapang ula ong ba ka Association kan sa shon shen ia ka jingialang ban rai ia ki sienjam kiba nangne shakhmat ha kaba iadei bad ka mat jingdawa.
“Ngin sa ia shong ha kine ki sngi ban wan ban shim ia ka rai ia kaei ka sienjam kaba ngin shim ban pynbor ia ka sorkar jylla”.
Ka sorkar jylla kan donkam ban pynlut sa kumba T.300 Klur na ka bynta ban pynkiew ia ka tulop jong ki nonghikai SSA, kane ka long katkum ka tyllong khubor kaba la ioh na ka sorkar.
Haba kylli, u Bah Lapang ula ong, “Kane kadei ka jingdawa kaba la sahteng naduh u snem 2019. Kiwei ki sorkar kila pdiang ban kyntiew ia ka tulop ka jong ngi da 100% hynrei kane ka sorkar wat hadien 8 snem ruh, kam shym la leh eiei halor kane ka bynta. Kam shym la don tang kawei ka sien ruh ban kyntiew naduh ba kala shimti ha u snem 2018.”
“Ki nonghikai LP kila ioh ia ka tulop kaba tang T.19,000 bad ki nonghikai UP kilaioh T.20,000. Ngi shem jingeh ban pyndap pynbiang ia ki jingdonkam ki jong ngi. Kala ktah ia ka bor pyrkhat bad ia ka iing ka sem, kumta ngam don eiei ban ong halor ka bhah tyngka jongka sorkar. Ngin shu ieh beit ha ka jingstad jong ka sorkar” ula bynrap.
Ha kaba iadei bad ka rai jongka MSSASA ban dawa ban thungkam pura ia ki nonghikai SSA, u General Secretary ka AMSSASTA ula ong, “Ngi kyntu ia ki ba kin wan iasnohkti lem bad ngi. Ka jingthungkam pura kan long kaba lut bun bha, dei halor kata, kumta ngi la rai ban phah kyntiew ia ka tulop. Ngi tip kan shimpor bha ia ka sorkar ban pynryngkam pura ia ki nonghikai. Da kane ka tulop kaba ngi ioh mynta, ka long kaba eh bha ia ki nonghikai SSA ban lah ban im”.
 watla ka dang don hapdeng jong ka jingiakhih da kaba shong kyllain mungor mynta la 8 sngi tam, ban pynbor ia ka sorkar ban pyntreikam noh ia ka jingkyntiew ia ka tulop jongki 13000 ngut ki nonghikai SSA.){kind=link}