Shillong, Risaw 09: Ka Meghalaya Sarva Shiksha Abhiyan Schools’ Association (MSSASA) ha ka sngi ba-ar, kala pan ia ka jiingkyrshan na ki Myntri Sorkar ban pynbor ia ka Sorkar ba kan wanrah ia ka policy ban thungkam pura ia palat 13000 ngut ki nonghikai SSA.
Ka kynhun jong kane ka Seng kala iakynduh bad aiti ia ka dorkhas halor kane ka kam sha ki arngut ki Myntri Sorkar-Bah Comingone Ymbon bad Bah Shakliar Warjri-ha Secretariat lem bad ia u nongaibuit ka Tnad Education Bah HM Shangpliang.
“Mynta ka sngi, ngi la wan bad kyrpad ia ki (Myntri Sorkar) ban kyrshan ia ka jingiakhih jong ki nonghikai SSA ba iadei bad ka jingdawa bala sahteng bha kata ba ka Sorkar kan wanrah ia ka policy ka ban ai jingshngain ia ka jingshakri jong ki nonghikai SSA. Baroh arngut ki mYntri kila kular ia ngi ba kin sa iakren ia kane ka kam bad u Myntri Rangbah” ong u President ka MSSASA Bah Aristotle Rymbai haba iakren bad ki nongthoh khubor hadien ka jingialang.
Ka MSSASA ha ka jingialang General Council ba dang shen, kala aipor ruh arbnai ia ka Sorkar Jylla ban pyntreikam ia ki mat jingdawa jong ka.
“Ngin ia ap ia kane ka jingaipor hashuwa ban shim ia kano kano ka rai kaba dei ban shim hadien habud” ong u Bah Rymbai.
Haba kylli, une u President ka MSSASA ula kyntait ban kynthoh ia ka jingiashongkyllain mungor ba dang iaid mynta jong ka All Meghalaya SSA School Teachers Association (AMSSASTA) ban dawa pynkiew tulop ba 100 % ia ki nonghikai SSA.
“Haba iadei bad ki kam jong ki nonghikai SSA, lada phi kynmaw ha u Naiting 2022, ngi la mih sha surok ban iakhih pyrshah ia ka jingbym lah ka Sorkar ban pynurlong ia ki jingdawa jong ngi. Ha katei ka por, ka Sorkar kala khot iakren ia ngi bad ngi la iakynduh ia ki OPhisar ka Tnad Pule Puthi, Symbud Myntri Rangbah, Myntri ka tnad Pule Puthi bad bun tylli ki jingialang kila long”.
“Ha ka 19 tarik Nailur, ngi la shong jingialang bad u Commissioner & Secretary ka tnad Pule Puthi. Ula pyntip ba na ki artylli ki mat jingdawa-ka jingpynkiew tulop bad ban pynrung ia ki nonghikai SSA na ka SEMAM sha ka Tnad Pule Puthi-ka Sorkar kan sa wanrah ia ka Cabinet Memorandum haba iadei bad ka jingshngain ka kam jong ki nonghikai SSA. Kaba mut ia mynta, ka Sorkar ka dang pynkhreh ia ka policy ba kumno kan shimti hi noh ia ki nonghikai SSA” ula ong.
 ha ka sngi ba-ar, kala pan ia ka jiingkyrshan na ki Myntri Sorkar ban pynbor ia ka Sorkar ba kan wanrah ia ka policy ban thungkam pura ia palat 13000 ngut ki nonghikai SSA.){kind=link}