Shillong Jylliew 26 : U MLA ka Khliehriat bad nongialam ka UDP Bah Kyrmen Shylla ha ka sngi Thohdieng ula ong ba ka Sorkar Jylla kala shimkhia bha ban pynbeit ia ki jingeh ha ka kam tih dewiong hynrei ula ban jur ba jingtih open-cast bala buh da ka Sorkar Pdeng kam lah satia ban treikam ha East Jaintia Hills namar ka jinglong jong ki jaka.
“Mynta ka Sorkar kala leh ia la ka kamram. Ha kano ka kyrdan, Ngam don jingtip, hynrei ka Sorkar kala leh iala ka kamram” ong u Bah Shylla haba pan por.
“Ngim lah ban khmih lynti ba kiei kiei kin jia tang hapoh ki khyndiat sngi, hynrei ngin ai ia ka por ia ka Sorkar. Ai ba ka Sorkar kan leh ia kaba donkam. Ha ka por kaba biang, kin sa pyndep bad pyntip sha ngi ia kaei kaba kila leh. Ia mynta hi, ka Sorkar kala leh ia ka kamram ba dei ban leh”.
Ula ong ba ka rukom shong jong u dewiong ha Jylla ka dawa ia ka rukom tih kaba kham pher na kiwei pat ki Jylla.
“Ka dei ka jingtih ba shapoh krem, hynrei ka lah ban nym long kumta sha kiwei ki Jylla. Ngi don ia ki kyrdan dewiong kiba rit bad ngi kloi ban pyniaid da ka jingtih kat kum ka juk saian kaba long kat kum ki kyndon bala buh da ka Sorkar Pdeng. Hynrei ka dei ban long kaba iahap bad ka thain jong ngi” ula ong.
U bah Shylla ula ong ba ki jingpyrshang ban tih open-cast kila pulom ha ka thain. “Dang shen, kila ai ha ngi ia ka jingtih open-cast. Ngi la iohi ia ki bad ngi la pyrshang ruh ban leh. Ngi la pdiang ia ka bad ngi la pyrshang, hynrei ngim lah satia ban pyntreikam. Hadien ba ngi iohi ba kam long kaba iahap ban leh ha ka jaka jong ngi, kane kala pynlong ia ngi ban kyrshan ia ka Sorkar ba kan wanrah ia katto katne ki jingkylla” ula ong.
“Lem kumta, lada dei ba ka iahap, balei ba ngi donkam ia kiwei pat ki rukom tih” ula bynrap.
