Shillong, Naiwieng 13: Ka nongbah Shillong kala pynkhreh ban shna thymmai ia ki surok ha shwa ban long ka National Games ha u 2027.
U Symbud Myntri Rangbah ka Jylla uba khmih ia ka PWD (Roads), u Bah Prestone Tynsong ula ong, ba ki Work Order kiba kot T.45 Klur lah dep ban ai ban shna thymmai biang ia ki surok ha Shillong hapoh jong ka Central Division.
“Ngi lah dep ai, ia ki Work Order kumba T.45 Klur ban shna thymmai ia ki surok ha Shillong, kiba hap hapoh jong ka Central Division” ong u Bah Tynsong.
Ula ong, ba ula dep bthah ia ka Bypass Division ban pynkhreh ia ki Estimate na ka bynta ki kam maramot, kynthup ia ka National Highway.
“Nga lah dep bthah ia ka Bypass Division ba kan pynbiang, haba don kino kino ki thliew ki syar ne donkam ban siang surok biang, kidei ban aiti ia ka Estimate” ula ong.
U Bah Tynsong ula ong ba ka sorkar ka iengskhem ban pynthikna ba ki jingpyniasoh lyngba ki surok ha ka nongbah Shillong bad ha ki jaka kiba marjan bad ka Shillong kin dei kiba la pynkhreh bad pynbit pynbiang shwa ban long ka National Games.
“Ngi long kiba skhem jingmut ban pynthikna ba ki jingpyniasoh lyngba ki surok ha kylleng ka Shillong ne hapoh jong ka nongbah kidei ban long kiba la pynkhreh bha shwa ban long ka National Games 2027” ula ong.
