Shillong, Naiwieng 13 : U Symbud Myntri Rangbah ba khmih ia ka Tnad District Council Affairs (DCA) Bah Prestone Tynsong ula pyntip ba ia ka tarik ban pynlong ia ka elekshon Garo Hills Autonomous District Council (GHADC) yn sa shim rai hadien ba pyndep ia ka jingpynbeit ryntih ia ki constituency bad ioh jingmynjur na u Lat.
U Bah Prestone ula ong ba u dang shu ioh jingtip ba ia ka kaiphod pynbeit ryntih ia ki constituency, lah dep ban pynkhreh bad mynta kan iaid lyngba ki kam kiba hap ban pyndep kat kum ka riti synshar.
“Nga dang shu ioh jingtip ba ia ka kaiphlod lah dep ban pynkhreh bad ia kane ka kaiphod hap ban aiti sha ka District Council” ula ong.
Ula batai ba hadien bala wanrah ia ka kaiphod hapoh ka Council, ka Executive Committee jong ka GHADC kan sa shong bishar bniah bad sa wanrah hapoh ka Iingdorbar ban ioh jingmynjur.
“Shisien ba ka EC jong ka GHADC kala dep bishar lut nadong hadong, kin sa wanrah hapoh ka Iingdorbar bad ka Iingdorbar kan sa mynjur ia ka” ula ong.
Hadien ba mynjur ka Iingdorbar ia ka kaiphod, yn sa phah pat sha ka Sorkar, ka ban sa phah ruh ia ka sha u Lat ban ai jingmynjur.
Ula iathuh ba ia ka tarik jong ka elekshon yn sa rai hadien ba la pyndep lut ia kine ki kam ba hap ban leh kat kum ka riti synshar.
 Bah Prestone Tynsong ula pyntip ba ia ka tarik ban pynlong ia ka elekshon Garo Hills Autonomous District Council (GHADC) yn sa shim rai hadien ba pyndep ia ka jingpynbeit ryntih ia ki constituency bad ioh jingmynjur na u Lat.){kind=link}