Shillong, Naitung 20 : U Director General of Police (DGP) ka Jylla Dr Lajja Ram Bishnoi, IPS, hynne ka sngi balang, ula leit iuhkjat kyndit kyndit ha shnong Mawlai bad iakynduh ia ki paidbah ka thain ban lah wanrah ia ka jingiajan hapdeng ka Tnad Pulit bad ki paidbah.
Ia une u Khliehduh ka Tnad Pulit la synran da u Superintendent of Police ka East Khasi Hills Bah Sylvester Nongtnger, u Superintendent of Police (City) Bah Vivek Syiem lem bad kiwei kiwei ki Heh Pulit ka District.
Une u Heh Pulit ula leit iuhkjat nyngkong eh ha Mawlai Kynton Massar bad nangne ula iaid kjat sha Mawlai Standbus bad rung sha Mawlai Phudmuri.
Ha kane ka jingiaid kjat, une u Heh Pulit ula ioh iakren bad ki Rangbah Shnong, ki Nongiaid lynti, ki samla pule bad ki nongshongdukan, haba kylli ruh ia ki jingeh ba ki iakynduh. Une u Heh Pulit ula buh ruh ka jingkyntu ia ki samla ba kin kiar na ki jingkyrni ba sinew kum ka jingdih droks bad kiwei kiwei ki jingdih pynbuaid haba pynshlur ruh ia ki ba kin iashimbynta shitrhem ha ki kam ialehkai bad ki jingpule.
Haba iakren bad ki nongthoh khubor, u Dr Bishnoi ula ong ba ka daw jong kane ka jingwan iuhkjat sha kane ka thain ka long eh ban wanrah ia ka jingiajan bad ki paidbah bad ban pan ruh ia ka jingiatreilang da ka jingthmu ban wanrah ia ka jingiadei ba iajan hapdeng ka Tnad Pulit bad ki paidbah.
“Ka thain ka long kaba shongsuk shongsain bad ki nongshongshnong ki long kiba sngewrit, hynrei ki don ha ki katto katne ki shnong ba ki paidbah kila ud ia ka jingjyllei ki kam khaii droks hynrei da ka jingiarap lang jong ki paidbah, ngin kwah ban iakhun pyrshah bad tehlakam ia kane ka jingeh” ula bynrap.
“Ka long kaba donkam ban iatreilang hapdeng ki paidbah bad ki Pulit namar tang ki Pulit marwei kin ym lah ban weng ia baroh ki jingeh. Ngi la wan hangne ban pan ia ka jingiatreilang bad ki paidbah khamtam eh bad ki Dorbar Shnong” ong u Bishnoi.
Une u Heh Pulit ula kyntu ia ki Dorbar Shnong ban iarap ia ki Pulit ha kaban ioh iasyllok bad ki khun Samla kiba la ngop ha ki jingdih pynbuaid.
Kum ban shu pynkynmaw, u Dr Lajja Ram Bishnoi ha ka 1 tarik Naitung, ula hiar iuhkjat kynsan kynsan ha Jaiaw ban peitthuh ia ka jinglong jingman ha ka thain khamtam hadien ka jingjur palat ki kam shohklep ia ki bar jylla bad ka jingjyllei ki kam khaii droks.
