Shillong, Naitung 14 : U Myntri ka Koit ka Khiah Bah Wailadmiki Shylla ha ka sngi Ba-ar ula ong ba ka Sorkar kan nym lah ban shu leh eiei tang na ki khubor Social Media halor ka jingpynjaboh ka karkhana pynmih ethanol ha Byrnihat tad haduh ba kan da ioh pdiang ia ki jingujor bad ki jingkhein jingdiah ban kyrshan.
U Bah Wailad ula ong ba kane ka jingkynnoh kam pat poi satia da ka jingthoh sha ka Sorkar Jylla bad ban jur ia ka jingdon kam ban pynshisha.
“Ym pat wan satia kano kano ka jingthoh. Ka long kaba kongsan ban ai da ka jingthoh nalor ki jingkhein jingdiah kiban kyrshan ia ka jingkynnoh” ula ong.
U bynrap ba katba ka Sorkar ka dang bishar ia ka kam, kam lah pat ban leh eiei mardor tang da kaba pynshong nongrim na ki jingthoh ha ki social media namar ka ktah ia ka kamai kajih.
“Ha u snem 2014, ka NGT kala wan rung. Ki jingktah ia ka mariang kila don ha katei ka por, ngim lah ban leh ia kata. Hynrei ngi hap ruh ban pyrkhat halor ka jingktah ia ki briew kiba sah ha kata ka thain” ong u Bah Wailad.
U Myntri u pyntip ba ka Sorkar kala dep shim ia ki sienjam ha Byrnihat, kynthup ka jingkhang dam ia ki karkhana kiba pynkhein ia ki kyndon.
Ula kdew ia ka jingai khusnam ba dang shen sha ka Meghalaya State Pollution Control Board namar ki kam ba kala leh ha ka thain, kiba long ki sakhi ia ka jingiaid ka kam ban pyrrkhing ia ka jingpynjaboh ia ka mariang.
U Bah Wailad ula pynshai ba ka Sorkar kam kyntait ia ki jingjaboh ka lyer ha ki jaka ba don ki karkhana hynrei ka long pat kaba donkam ban hap pynshisha ia kiba pynkhein kyndon.
