Shillong, Naitung 14: Ka Sorkar Meghalaya ka dang ap ia ka kaiphod na ka NEIGRIHMS halor ka jingkynnoh leh kynshlein uwei nongtrei Nos shynrang hashuwa ban shim ia kano kano ka sienjam, ong u Myntri ka tnat ka koit ka khiah Bah Wailadmiki Shylla.
Haba kren shaki lad pathai khubor, u Bah Wailad u la ong ba ka NEIGRIHMS ka la pynlong ia ka jingtohkit halor kane ka kam.
“Ki bor pyniaid ka NEIGRIHMS kila pyntip ba ki dang pynlong ka jingtohkit. Ngi dang ap ia ka kaiphod jong ki” u la ong.
U Myntri u la ong ba ka Sorkar Jylla kan sa shim ia kiwei pat ki sienjam hadien ba la bishar bniah ia ki jinglap jong ka kaiphod bala pynlong daka NEIGRIHMS.
“Da kaba pynshong nongrim na ka kaiphod jong ki, ngin sa shimkhia. Ngi donkam ban ai por ia ki ban pyndep ia ka jingtohkit bad ban lap ia kaei kaba la jia” ula ong.
U la bynrap ruh ba ka Sorkar kan tuklar lada lap ba don kino kino ki jingbakla.
