Shillong, Naitung 14 : Ka Khasi Students’ Union (KSU) ha ka sngi Ba-ar kala dawa ia ka Sorkar Meghalaya ban khang dam syndon ia ka Ophis ka Atomic Minerals Directorate (AMD) ha Nongmensong bad ban phah ktien sha ka Sorkar Pdeng ba ka Jylla kam pdiang satia ia ka jingtih Uranium.
U General Secretary ka KSU samla Reuben Najiar ula pynpaw ba ki jingsngewkhia kila mihbiang hadien ba u Myntri ka Sorkar Pdeng Dr Jitendra Singh ula pynpaw dang shen ba ka jingtih uranium ka lah ban urlong ha Meghalaya.
“Ka don ka dak kaba shai ba ia kane ka kam la pynim biang. Ki briew kila thied ia ki jaka ha Domiasiat bad kiwei ki jaka ba don ka par uranium. Ki briew kiba don ka bor, kynthup kito kiba don jingiadei bad ka Sorkar, kila leit sha kine ki jaka bad khroh ia ki trai shnong ba kin die ia ki jaka jong ki” ong u samla Reuben haba iakren bad ki nongthoh khubor.
Ula pynpaw ba ki khubor ha ki lad pathai khubor ba sot ia ka jingkren u Myntri ka Sorkar Pdeng kala pynieng rasong ia ka jingsngew jong ka KSU ba ka Sorkar India kala kyntur ban tih ia u uranium ha Meghalaya.
U samla Reuben ula ong ba ka Sorkar Jylla ka dei ban kyrshan ia ki jingpyrshah jong ka da ka kam. Ula kyntu ia ka Iingdorbar Thaw Ain ba kan mynjur da ka resolution ba pyrshah ia ka jingtih uranium bad ban phah sha ka Sorkar pdeng.
“Tang ka ktien kam pat biang satia. Ka resolution ka lah ban nym don bor ia ki ain ka Sorkar pdeng, hynrei kan phah ia ka khubor synshar kaba khlain” ula ong.
Ka KSU kala kyntu ia ka Khasi, Jaintia bad Garo Hills Autonomous District Council ba kin wanrah ia kajuh ka resolution bad pyndonkam da ki bor ka Sixth Schedule ban thaw ia ki ain kiba khang ia ka jingtih uranium.
U samka Reuben ula pynpaw ba ki par uranium ki don tang hapoh South West Khasi Hills hynrei ki don ruh haki bynta ka ri lum Jaintia bad Gari, kaba pynlong kongsan ia ka jingshim rai da baroh lai tylli ki Council.
Haba buh jingkylli ia ka jingiai don ka AMD ha Shillong, u samla Reuben ula ong “Lada ka Sorkar kam kwah shisah ban tih uranium, kaei pat ka jingmut ban buh ia ka ophis ka AMD ha Nongmensong? Bthah ia ki ban mih noh. Katba ka Ophis ka dang don, kane ka mat (tih uranium) kan ym iap satia”.
Ula ban biang ia ka jingpyrshah jur jong ka KSU haba kdew ia ki jingpynjot ia ka mariang bad ka imlang sahlang kaba la wanrah da ki jingwad ia u mar (exploratory) bala leh ha ki snem bala leit noh.
“Ngi la iohi katno tang ka jingtih ban wad ia u uranium kala ktah ia ki briew, ki jaka bad ka rep ka riang. Ngim lah ban mutdur ia ki jingktah lada shah tih ia une u marpoh khyndew. Ngin ym ailad satia ia ka” ula ong.
U samla Reuben ula kdew ia ka nongrim ka Jylla kat kum ka history haba pynpaw ba ka Federation of Khasi State kam shym la soi ia ka Instrument of Merger.
“Haduh mynta la pyniasoh ia ngi sha ka ri India tang lyngba ka Instrument of Accession. Kane ka mut ba ngi dang bat halade ia ka jingsynshar halade hala ka jong ka bor” ula ong.
Ula maham ba kano kano ka jingpyrshan da ka Sorkar Pdeng ban pynjari ia ka jingtih uranium kan pynkhie im biang ia ka jingiakhih.
 ha ka sngi Ba-ar kala dawa ia ka Sorkar Meghalaya ban khang dam syndon ia ka Ophis ka Atomic Minerals Directorate (AMD) ha Nongmensong bad ban phah ktien sha ka Sorkar Pdeng ba ka Jylla kam pdiang satia ia ka jingtih Uranium.){kind=link}