Shillong, Risaw 6: U Myntri Rangbah ka Jylla Conrad K Sangma ha ka sngi Ba-ar ula ong, ba ka jinglum pisa be-aiñ na ki trok kadei kaba ym lah ban pdiang satia bad bynrap ba ka jingshim ia ki sienjam kiba tyngeh kadei kaban hap pynshong nongrim katkum ki sabut ym tang da kaba shu kynnoh.
Haba kren halor ka jingkynnoh lum pisa be-aiñ, kaba la sei madan da ka Khasi Students’ Union (KSU), u Sangma ula ong, ba ka sorkar ka long shai kdar ba kum kitei ki jingjia kim dei ban jia satia.
“Ngi long kiba shai kdar ba ha kum kitei ki jingjia kum katei, ia ngi hi, ngi kwah ba ym die ban don kum kitei ki jingleh ba kin jia bad dei ban leh da kaba tyngeh. Kumta ia ngi hi, ngi iengskhem bad ngi long kiba shai bha halor katei” ula ong.
Ula banjur ba ka sorkar kam lah ban leh eiei lada kadei kaba la pynshong nongrim tang ha ki jingkynnoh.
“Ha ki jingjia kiba kum kitei, ngi donkam ban treikam halor ki sabut kiba paka bad ngim lah ban iaid tang halor ki jingkynnoh, kumta dei ban pynshong nongrim ia kaei kaba ngi dei ban leh da kaba tyngeh” ula bynrap.
U Sangma ula pynthikna ba lah dep ban shim ia ki sienjam kiba tyngeh haba ki ioh ia kino kino ki jingtip ia kum kitei ki jingleh kiba la pynsngew sha ka sorkar bad ngi ngin shimkhia ruh wat ha ki por ban wan.
“Nga pynthikna ia baroh, haba ngi lap ia kino kino ki jingjia, haba don kano kano ka jingjia, kino kino ki jingtip kiba wan sha ngi, ngi lah leh da kaba tyngeh. Ha ki por ban wan ruh, lada donkam, ngin leh da kaba tyngeh” ula ong.
U Myntri Rangbah ula ong, ba ka long kaba donkam ban bud ryntih ia ki kyndon ain.
“Ngi hap ban pynthikna ba baroh ki jingshisha bad ki jingtip kidei kiba hap ban bishar bniah, baroh ki sakhi bad ki sabut kidei ban don bad haba mih kano kano ka jingjia, ngi lah leh da kaba tyngeh. Kumta yn um don mano mano ruh kiban lah ban shu poi beit sha kaba kut bad ban ong ba katei kala jia. Ngi hap ban trei katkum ki sabut bad ki sakhi bad kumba nga lah kdew, ba ngi long kiba shai kdar ha ka Nongrim kaba ngi ieng ha kaba iadei bad kine ki jingleh ia kitei ki jait kam ia kaba ngin ym ailad, lada ngi lap ia kum kitei ki jingleh ba ki jia, ngi ngin leh da kaba tyngeh” ula bynrap.
