Shillong, Risaw 06 : U Myntri Rangbah Conrad K Sangma ha ka sngi Ba-ar, ula pyrshah jur ban phah tuklar ia ki bor nongwei halor ki ain ka Ri, bad ong ba kane ka pynkhein ia ka bor trai ri bad ka jinglait luid jong ka Ri.
Kane ka jingkynthoh kala mih halor ka jingkynnoh ba u MP ka Tura Saleng Sangma ula phah tuklar ha ki bor nongwei halor ka Foreign Contribution Regulation Act (FCRA) kaba la pynmih ia ka jingsngew khia kaba jur hapdeng ki Khristan.
“Ka sienjam baroh kaba lashim ka dei ka bym iahap satia haei haei ruh, kam iahap namar ngi iakren ia ka jinglong trai jong ka Ri jong ngi, ngi iakren halor ki Bill bad ki Act bala shna da ki briew jong ngi na ka bynta ki briew jong ngi da ki nongthaw ain jong ngi” ong u Conrad.
“Kumta, ka jingkylli ban tuklar ki bor nongwei ka long shabar ka jinglong trai bad ka jinglaitluid jong ka ri jong ngi bad ka bor ban shna iala ki jong ki ain. Kumta, ka long ka bym iahap satia haei haei ruh” ula bynrap.
U Conrad u ong ba kala don ka jingleh bakla bad ym dei shuh ban nang leh biang, hynrei ka jingpynleit jingmut mynta ka dei ban long halor ka jingweng ia kane ka jingeh.
“Kaei kaba kongsan ka long ba katba kaei kaba leh da u MP ka long ka bym iahap, Nga tharai kaei kaba kongsan ia ngi ban khmih ka long kaei kaba hap ban leh. Ngam wan hangne ban pynrem iano iano ruh lane ban ong ba kaei kaba la leh kiwei ka long kaba bakla, ia ka jingbakla lah dep ban leh, kyrmen skhem ba kan ym don shuh ka jingleh bakla hadien habud” ula ong.
“Kaei kaba kongsan ia ngi baroh kum ki nongmihkhmat paidbah ka long ban iatreilang bad ngi donkam ban sngewthuh ba kane ka kam ba mynta kan ktah ia ngi baroh. Kam dei kaei kaei kaba ngin pynlong kam sain pyrthei tang ban ioh jingmyntoi” ula bynrap.
Haba iai ban biang ia la ka nongrim, u Conrad ula ong “Nga la kren shai bha ba ka jingkylli ban phah ia kano kano ka jingtuklar da ki bor nongwei ia ki ain, ki bill ka ri kaba ngin sa mynjur, kum ka Iingdorbar, ka Parliament lane Iingdorbar Thaw Ain ka Jylla na ka bynta ki briew jong ngi, ka long ka bym iahap satia. Ngi thaw ain, ym dei ban don mano mano ruh kiba lah ban mushlia na shabar”.
