Shillong, Naitung 06: Ki Pulit ka Ri-Bhoi District ki la ioh ban bat ia artylli ki bos Night Super ka Assam bad ioh kurup ia palat 90 byrni u kwah Burmese Supari ba thmu ban pyniaid iew ha Guwahati.
Kat kum ka khubor Pulit, kine ki bos ba don u nombor AS-01-DC-7860 bad AS-01-HC-9034 ki la mih na Jiribam bad Dharmanagar ha ryngkat une u kwai supari uba thmu ban pynpoi ha Guwahati.
Ki Pulit haba ioh jingtip ia kane, kila pynlong ia ka jingtalasi kali ha Byrnihat bad kila ioh ban bat ia kine ki kali ha ka step sngi ba-ar ha ka por 6 baje eiei.
Kat kum ka jingphla jong uwei u Nongniah bos u Rafikul Rehman, une u kwai supari u dei jong uwei u briew ba kyrteng u Hiren Ali, uba dei ruh u trai jong kine ki bos Night Super bad ba ju leh ia kane ka kam be-ain kata ban khaii tuh ia u kwai supari.
Ki Pulit ki pyntip ba kila ioh kem la bunsien ia ki bos jong u Hiren Ali kiba kit ia u kwai supari ha Ri-Bhoi bad ka jingthwet ban kem ia une u briew, kala iaid shakhmat.
Ki Pulit ki iathuh ba hadien bala pyndep lut ia ki jingdonkam baroh, ia une u kwai supari yn sa aiti noh sha ka Tnad Custom ba kan leh ia kaba donkam.
