Shillong, Naiwieng 03: U Myntri Sorkar u Timothy D Shira u la pynpaw ka jingsngew rit ia ka jingshah shim noh iaka tnat Tourism, da kaba ong ba u kloi ban pdiang ia kano kano ka rai ba la shim da u Myntri Rangbah ka jylla u Conrad K Sangma.
Ia ka tnat Tourism la aiti biang sha u Bah Paul Lyngdoh uba la bat teng ia kane ka tnat hashuwa ban shah pynhiar shuki.
“Iaka tnad Tourism la dep ban shim noh na nga. Ngam tip kaei ka tnat ba ngan ioh thymmai” la ong u Timothy.
“Ka dei ka bor bad ka rai jong u Myntri Rangbah ka Jylla. Lada ai ei ei ha nga, nga sngewhun,” u la bynrap.
U Timothy u la ong ba ym shym la iasyllok hashuwa ban shim noh iaka tnat Tourism na u had naka liang jong u, um don kano kano ka jing sngew wit.
“U Myntri Rangbah u tip ia ka jingmut jingpyrkhat jong nga. Wat lada ym shym la pan jingmut na nga, ngam sngew pyrshah, nga lah beit ban pdiang. U tip bha ia ka jingmut jingpyrkhat jong nga bad u tip ia ka jinglong ba iaineh jong nga ha ka party,” u la ong.
“Ngi don hangne ym ban ioh nong shimet hynrei ngi don hangne ban shakri ia ki paidbah,” la ong u Shira.
