Shillong, Naiwieng 03: Ka kynhun Indian Olympic Association (IOA) Games Technical Conduct Committee (GTCC) kaba don 5 ngut ki dkhot hapoh ka jingialam jong ka Chairperson Sunaina Kumari ka la poi sha Shillong ha ka 2 tarik Naiwieng na ka bynta ka jingleit jngoh bad bishar bniah ia ka jingpynkhreh jong ka jylla Meghalaya ia ka National Games.
Kane ka jingwan jong kane ka committee kaba la buh ban long naduh ka 2 haduh ka 5 tarik Naiwieng ka kynthup ïa ki jingïalang bishar bniah bad ka jingleit jurip ïa ki jaka ïalehkai ha Shillong bad ha Jowai. Ki jingialang ki long ban bishar bniah ia ka jingpynkhreh baroh kawei na ka bynta ka National Games.
Ïa kine ki jingïalang bishar bniah la pynïaid da u Myntri ka tnat Sports bad la ïashim bynta da u Commissioner bad Secretary ka tnat Sports, ki ophisar bad ki nongmihkhmat jong ka Meghalaya State Olympic Association, kynthup ïa u Working President, General Secretary, Vice President bad Treasurer.
Ka Committee kan jurip ruh ia ki jingtei iaki jaka ialehkai bad kan bishar bniah ia ka jingpynkhreh ia ki jaka.
Ia ka Tura yn kynthup lang haka jingwan jurip thymmai haki bnai ban wan.
Kane ka kynhun kaba don san ngut ki dkhot ka kynthup ïa ki nongpynïaid ïalehkai kiba la tbit ha ki thup ïalehkai National bad International.
Ïa kane ka kynhun la ïalam da ka Sunaina Kumari, kaba dei ka President jong ka Asian Lawn Bowls Federation bad ka Executive Member jong ka Bowling Federation of India.
Kiwei pat ki dkhot ki kynthup ia u Maninder Pal Singh, Secretary General ka Cycling Federation of India, dkhot jong ka BMX Commission jong ka Asian Cycling Confederation bad Vice President jong ka South Asian Cycling.
Ha kane ka kynhun ki kynthup ruh ïa u Sunil Kumar, President jong ka Kerala Olympic Association, bad Dushyant Sharma u President barim ka Wrestling Federation of India bad uba dei mynta u President ka Jammu and Kashmir Olympic Association.
Kane ka jingialang bad ka jingbishar kam kaba saw sngi la khmih lynti ba kan ai ka jingkhmih bniah halor ka jingpynkhreh jong ka Meghalaya, khamtam eh halor ka jingpynkhreh ia ki jaka ïalehkai bad ki jingtei, ha shwa ka National Games.
