Shillong, Naiwieng 3: Ki shiphew tylli ki sengbhalang ha ka sngi ba-ar kila ai por 30 sngi ia ka sorkar Meghalaya ban pyntreikam ia ki ain kiba lah don lypa ban pyrkhing ia ka jingwan rung kyrtep ki bar Jylla bad byrngem ban pynlong da ka jingiakhih kaba tyngeh lada bym pynurlong ia ki mat jingdawa.
Ha ka dorkhas kaba kila aiti ha u Myntri Rangbah ka Jylla Conrad K Sangma, ki sengbhalang kila pan jingpynshai halor ka jingbym lah pyntreikam ia ka Meghalaya Residents Safety and Security Act 2016, ki Entry bad Exit Points, Meghalaya Identification Registration (Safety and Security) of Migrant Workers Act 2020, ki kam khappud bad ka Meghalaya, Benami Transactions Prohibition and Detection Act.
“Ngi pynpaw ia ka jingsngewkhia kaba jur halor ka jingpynslem jong ka sorkar jylla ban pyntreikam ia ki ain bapher bapher ban iada ia ki jaidbynriew riewlum na ka jingwan ki briew kiba nabar ha ki rukom bapher bapher” pynpaw ha ka dorkhas.
Kine ki kynhun kila ong ba kine ki aiñ kila don lypa ban ïada ïa ki jaidbynriew trai ri trai muluk kiba rit paid na ki briew kiba nabar, la kidei kiba wan na ki Jylla ba marjan ne na kiwei pat ki ri.
“Hynrei ka Sorkar kam don ka mon kaba jwat ban pyntreikam pura ïa kine ki aiñ bad kane ka buh jingma ïa ki jaidbynriew kiba kynthup ia ki Khasi, Jaiñtia bad ki Garo,” kila ong.
Haba pynkynmaw ia ki mat jingdawa kiba la dawa naduh u snem 2013-14 ban ïada ïa ka bha ka miat bad ka ioh ka kot jong ki paidbah ka Meghalaya, ki sengbhalang kila ong ka jingpulom kan pynlong ia ki ban ym don da kiwei pat ki lad ban shim.
“ Ngi lah ai por 30 sngi ïa ka Sorkar Jylla ban pyntreikam ïa kine ki aiñ kiba lah don lypa. Lada ka Sorkar ka pulom ha kaban leh eiei ïa kane, ngi kum ki kynhun jong ki sengbhalang ngin pynlong ia ki jingïakhih paitbah lada ka Sorkar ka dang sngap jar halor kine ki jingdawa kiba shong hok,” kila ong.
Ia kane ka dorkhas lah soi da ki nongialam jongka Federation of Khasi Jaiñtia and Garo People, Hynñiewtrep National Youth Front, Ri-Bhoi Youth Federation, Jaintia Students Union, Garo Students Union, A-Chik Youth Welfare Organisation, Association for Democracy and Empowerment, Federation for A-Chik Freedom, All A-Chik Youth Welfare Society bad ka A-Chik Holistic Awakening Movement.
