Shillong, Naitung 06: U President ka BJP Meghalaya Bah Ernest Mawrie u la pyntip ba ki seng saiñ pyrthei bapher bapher ka Jylla, kila pynthikna ba kin ai ia ka jingkyrshan kaba pura iaka kyrtong President jong ka NDA ka Draupadi Murmu ba kan ioh long kum ka President jong ka ri India ka ban mihkhmat ia ki riewlum jong ka ri India.
“Ka seng NPP, UDP, HSPDP, NCP bad kiwei kiwei kila pynpaw ba kin ai jingkyrshan ia ka Murmu” ong u Bah Ernest haba iakren bad Ka Shlem hadien ka jingialang ha Orchid Lake Resort, Umiam.
Une u Nongialam ka BJP ula iathuh ruh ba ula dep ban ia u nongialam jong ka AITC u Bah Charles Pyngrope ban ai jingkyrshan lem ia ka kyrtong President jong ka NDA bad yn sa kyntu ruh ia u nongialam ka Congress u Bah Vincent Pala uba long u MP ka jylla ban iasnohkti lang.
U ne u nongialam ka BJP u la ong “Kane kadei ka kabu kaba biang tam ban jied iaka Murmu kum ka Presidnet namar ka dei ka longkmie kaba mihkhmat iaki riewlum. Ki Nongmihkhmat ka jylla ki dei ban klet shuwa shipor iaka party ka jongki hynrei ban ai jingkyrshan ia kane ka kyrtong kaba dei ka riewlum ba kan ioh long kum ka President jong ka ri”.
U Bah Ernest ula iathuh ba ka Draupadi Murmu haba ai jingkren hakhmat jong ki nongialam bad ki nongmihkhmat ka jylla, kala kyrpad ia ki MLA ba kin kyrshan lem ia ka ha ka elekshon President bad kala kren ruh shaphang ka jingdonkam ban ai jingiada ia ki kynthei bad ki longkmie bad ynda kala shimti kum ka President kan leh ia kiba bun ki kam naka bynta ki paid riewlum jong ka thain shatei lammihngi.
