Shillong, Naitung 15 : Ka Madanrting kala kylla long ka census town kaba nyngkong eh ban ioh ia ki jingmyntoi kiba wan lyngba ka skhim Mahatma Gandhi National Rural Employment Guarantee Scheme lane ka skhim 100 sngi.
Ka jingioh jong ka Madanrting ban ioh lang noh nangne shakhmat ia ki jingmyntoi jong ka skhim 100 sngi kadei da ka jingiakhun borbah u Myntri Rangbah ka jylla, Conrad K Sangma ban ia kren bad ka sorkar pdeng namar kitei ki jaka kim ju ioh ia ki jingmyntoi ne ki skhim pynroi na ka tnad pynroi sor lymne na ka tnad pynroi nongkyndong.
Na ka liang u MLA ka thain kum ka dak ban lehkmen halor katei ka jingshah kynthup lang ha ka skhim 100 sngi hynne ka sngi u la plie ruh ia u mawsahnam ha ka jingialang kaba long ha Madanrting.
Ha kane ka sngi la donlang ruh naduh u MDC ka thain Bah Latiplang Kharkongor, ka Deputy Commissioner jong ka East Khasi Hills, Kong I Laloo, ki Block Development Officer bad ki nongialam shnong.
Haba kren ha kane ka sngi u Bah Lambor Malngiang u la ong ba kane ka skim kan pynkyla dur ia ka shnong ka thaw bad ruh ia ki kam pynroi bad ka jingmyntoi ha ki iing ki sem.
