Guwahati, Naiwieng 1: Lai ngut ki briew kiba dei na ka jaidbynriew Kuki ki la ïap ha ka jingïasiat kuli mar kylliang hapdeng ki kynhun kieng atiar bym lah ban ithuh ha ka shnong Kekru Naga kaba hap hapoh ka Nungba Police Station ha Manipur’s Noney district ha ka step sngi saitjaiñ jong ka 31 tarik u Risaw, la pynthikna ki pulit.
Ki pulit ki la iathuh ba la buh ia ki lad jingiada kiba donkam bad ka jinglong jingman ka la don hapoh ka jingpyniaid. Hynrei ym shym la pynpaw shai ia ka jinglong jong kitei kiba la khlad noh bad ki jingjia kiba la pynlong ia katei ka jingiasiat suloi.
Katkum ki tyllong khubor ba la ïohlum na katei ka thaiñ, la ong ba katei ka jingsiat ka la sdang ha ka por kumba 9.30 mynstep hadien ba la kynnoh ba ki kaikhlaw Kuki ki la hiar thma ïa ka shnong Tazeikaiphun Naga ha ka sngi kaba lai lynter, da kaba pyndonkam da ki suloi bad ki tiar pynbthei.La iathuh ba kitei ki briew kiba don tiar ki la wan shajan na ka liang jong ka shnong Longpi, kaba la pynlong ia ki nongap shnong Naga ban pynphai kylla.
Ka jingïather mar kylliang ka la ïai bteng man ka por haduh ban da janmiet. Hadien ba ka jingsiat ka la kham duna, la iathuh ba ki nongap shnong Naga ki la lap ia lai tylli ki met iap ha ka jaka ba ki suba don ki nongthombor. Ki la ioh kurup ruh lai tylli ki suloi AK-series, kawei ka suloi A1, kawei ka suloi single-barrel, ar tylli ki tiar pompi, ki tiar pynbthei, ar tylli ki wireless set bad shibun ki tiar siat.
Kane ka jingjia kaba dang shu jia thymmai ka long hapdeng ki khubor ba la don ki jingshah thombor bunsien ha ka shnong Tazeikaiphun ha kaba sdang jong ka taiew, kynthup ïa ka jingkynnoh ba la thang ïa ki ïing bad kiwei kiwei ki jingtei ha ka 29 tarik u Risaw.
Ha kajuh ka por, ka Kuki Inpi Manipur, ka apex body kaba mihkhmat ia ka jaidbynriew Kuki, ka la pynrem jur ia kitei ki jingshah pyniap bad kynnoh ba ki kynhun kieng atiar Naga ki dei kiba donkti. Ka la dawa ia ka hok bad ka jingkitkhlieh bad ka la kyntu ia ka sorkar ban tuklar mardor.Ia ki jingkynnoh ym shym la pynshisha da kaba laitluid.
Ka jingjia ka pynpaw ïa ka jingïakynad kaba thymmai hapdeng ki jaidbynriew Kuki bad ki Naga ha ki jaka lum jong ka Manipur, kaba la pynmih ïa ki jingsngewkhia kiba thymmai halor ka jingshngaiñ jong ki riew paidbah bad ka jinglah ban nang jur shuh shuh.
