SHILLONG, NOV 1: Ka Jylla Meghalaya kala ioh pdiang T.688 Klur kum ka bhah jong ka jingioh lypa ia ka bhah khajna kaba la pyllait da ka Sorkar Pdeng ha ka sngi Saitjain ban plie lad ia ki Jylla ban kin lah ban kyntiew sted ia ka jingpyndonkam ia ka pisa hashwa ban wan ki aiom lehkmen.
Ka Sorkar Pdeng kala pyllait lypa ia ka pisa jong ka bhah khajna sha ki Sorkar Jylla kaba kot haduh T.1,09,019 Klur ha ka 31 tarik u Risaw 2026, kaba long ka jingai shuh shuh ia ka pisa kaba dei ban ai man la u bnai. Kane kadei ka jingpyllait ia ka pisa ha ka sien ka baar hapoh jong une u snem mang tyngka, la pynpaw ha ka kyrwoh khubor.
“Kane ka jingpyllait pisa kadei halor ka nongrim ban wan ki aiom lehkmen bad kan pynlah ia ki Jylla ban pynsted ha ka jingpyndonkam ia ka pisa bad ruh ban bei tyngka na ka bynta ki kam pynroi bad ki jingpynlut kiba iadei bad ki kam halor ka bha ka miat” la ong ka Ministry.
Na ka T.1,09,019 Klur, ka Uttar Pradesh kadei ka Jylla kaba la ioh pdiang bun tam eh ia ka pisa kaba long T.19,208 Klur, kaba la bud pat da ka Bihar kaba long T.10,845 Klur, Madhya Pradesh kala ioh T.8,010 Klur bad ka West Bengal T. 7,866 Klur.
Hapdeng ki Jylla ka thaiñ shatei lammihngi, ka Assam kala ioh T.3,552 Klur,
Arunachal kala ioh T.1,476 Klur, ka Manipur kala ioh T.682 Klur, ka Mizoram kala ioh T.615 Klur, ka Nagaland kala ioh T.524 Klur, ka Tripura kala ioh T.699 Klur bad ka Sikkim kala ioh T.365 Klur.
