Shillong, Naiwieng 1 : Ka United Democratic Party (UDP) kan sa lum ia ka jingialang jong ka Central Executive Council (CEC) ha ka 3 tarik Naiwieng ban iasyllok ia ka jinglong jingman ka sain pyrthei ha Jylla nalor ka jingkyrshan ia ka Sorkar Meghalaya Democratic Alliance –II.
Ia kane la pyntip da u President ka UDP Bah Metbah Lyngdoh haba pynbna ia ka jingiehnohkam kum u Myntri na ka kynhun Myntri ka Sorkar MDA-II hynne ka sngi Saitjain.
U Bah Metbah ula kren shai ba ka jingiehnohkam jong u ka dei hadien ba ula sah satang marwei kum u MLA ka party da ka jingphet seng ki 11 ngut ki MLA.
U Bah Metbah u dei uba bat ia ka shuki Myntri ba khmih ia ka Tnad Bording, Water Resources, Taxaton bad Textiles naduh u bnai Nailur jong u snem bala lah.
Haba kylli ia ki sienjam ba un shim hadien, u Bah Metbah ula ong ba ka jingiehnohkam kum u Myntri ka dei ka rai kaba nyngkong, ka rai kaba ai kan long halor ka jingkyrshan ia ka MDA ka ban sa shim hadien ka jingiakren hapoh ka party.
“Ka rai kan sa mih ha kine ki sngi ban wan hadien ka jingiasyllok bad baroh ki kynhun ba don bynta ha ka kam bad ngin sa shim rai ha ka jingialang ka CEC ha ka 3 tarik Naiwieng” ula ong.
“Ia mynta, Nga la iehnohkam kum u Myntri ka Kynhun Myntri. Ka rai ba-ar, ngin sa shim hadien ka jingiakren hapoh ka party, kane ruh kan dei ka rai jong ka party” ula bynrap.
U bah Metbah ula kyntait pat ban kynthoh eiei la un sa shong noh sha ka Liang Pyrshah ha ka Iingdorbar, da kaba ong “Ngan ieh ia ka ha ka party, ha ki nongkitkam ka CEC ba kin shim ia ka rai bad ban ai jingmut lang”.
