U Secretary ka Bar u buhrieh ia ka jingdon jingiadei bad u contractor
Shillong, Naiwieng 01 : U Advocate General Amit Kumar ha ka sngi Saitjain ula ong ba u Secretary General ka High Court Bar Association Kishore Ch Gautam, ula buhrieh iala ka jong ka jingmihkhmat kum u nongsaid ain ia ujuh u contractor bad iarap ban pynrem ia ka jingkam ba T.1,588 klur, haba kynnoh pat ia u ba u pan dor heh.
Haba pynphai kylla ia ki jingkynnoh ba ula pan bai muktiar haduh T.1,50,000 shisien mihkhmat ha ki Commercial Court na ka T.20,000 ka dor bala buh bad ialam bakla ia u paidbah ha ka 3 tarik Nailur, u Kumar ula ong ba kane ka kam ka dei kaba “bakla bad kaba lamler”.
U iathuh baka Office Memorandum ka Law(B) ba 11 tarik Naiwieng 2018, kaba shaniah da u Gautam dalade, kala kren shai ba kum kine ki jingiakren pynbeit kim hap satia hapoh ka OM bad ong ba ka bai muktiar ia ki kam bym shym la kdew ha ka jingbthah, dei ban iakut da ka jingiamynjur lang.
Ki lai tylli ki jingiapynbeit, u ong, kim dei ki mukotduma ba kumne kumta. Ka BSC-C&C JV ka kynthup ia ka surok NH-44 Shillong-Nongstoin bad urok Nongstoin-Rongjeng-Tura hapoh ka SARDP-NE, kaba la khot tender da ka Sorkar Pdeng ha u 2009, ka dor ka mur kala kiew sha ka T.2,406 klur, 16 valume, 11,000 sla, 80 hearing hakhmat ka Tribunal, Commercial Court, High Court bad Supreme Court. Ka BSCPL ka dei ka surok Garabadha-Dalu bala bei da ka ADB. Ka Marbiang ka dei T.1,100 klur ha MUDA Complex ha Police Bazaar. Ka MUDA kam hap satia hapoh ka OM.
“Ka jingkam ba T.1,588 klur kan jin da long T.1,7,88 klur ryngkat ka sut kat haduh ka 31 tarik Risaw, 2026. Kano kano ka jingleh bakla kan jin da wanrah ia ka jingduh kaba khraw bha ia ka pla tyngka u paidbah” ong u Kumar.
Halor ka jingtreikam kaba shai, u ong ba ia ka bai muktiar lah phah sha u Chief Engineer (NH) ha ka 19 tarik Nailar, 2019 hashuwa ban poi ka mukotduma sha ka Commercial Court, haba ai jingmut ban mang lypa ia ka pisa. U Chief Engineer ula phah sha ka Regional Office ka MoRTH kaba la pan ia ka jingpynshai ha ka 31 tarik Nailar, 2021. Ha ka 8 tarik Nailur, 2021, ula pynksan haba kdew ia ka jingbun palat k kot ki sla, ka kyndon 16, Order I Rule 10 bad kyndon 31 (6) application, bad ba ka RLDA kala thung ia u ha u 2020 ha ka dor ba T.2,50,000 shisien mihkhmat ha kum kane ka juh ka jingiapynbeit.
U iathuh ba ula iasaid na ka bynta ka jingtynjuh pyrshah jong ka Sorkar ia ka interim award ba 27 tarik Naitung, 2021 ba bthah ban siew T.75 klur, bala pynsangeh ha ka 29 tarik Risaw 2021.
U AG ula ong ba ka Tribunal kala kyntait ia ka jingkam ba T.1,470 klur –T.313 klur ka jingkam dierpor jong ka BSC nalor ka sut, bad baroh ki jingkam jong ka BSCPL bad Marbiang- bad ai ia ka rai ban siew sha ka Jylla T.13 klur.
U iathuh ba ki contractor kila thung ia ki muktiar kiba paw bha na shabar ka Jylla, uwei na ki u dei u U Hazarika uba kam T.2.37 klur ka jingsiew bym pat siew na ka BSC-C&C JV hakhmat ka Commercial Court.
Haba ther kylla ia u Gautam, ula ong “U dei u nongiasaid ain na ka bynta ka BSC-C&C JV ha ka mukotduma Arb A No. 6 of 2023, ka hukum kaba la pyni ha ki lad pathai khubor bad u nongsaid ain na ka bynta ka BSCPL ha ka Arb P No. 1 of 2021, 2 of 2024, 1 of 2025 bad ka writ appeal bala mudui lyngba jong u ha u Kyllalyngkot 2026. Ula dei ban pyntip sha ki lad pathai khubor ia ka jingdon bynta lang jong u”.
U iathuh ba ka ejahar 286(9)/2024 ha Sardar PS ba 10 tarik Nailur 2024 hapoh ka kyndon 120B, 409, 420, 465, 468, 471, 477A IPC bad 13(2) PC Act pyrshah ia ka JV, ki paralok bad ki nongtrei kaba la pynshong nongrim na ki kot jingkhein ba pyni ia ka kyiad bad ki jingai sngewbha ba rem dor sha ki Engineer, ki Nongtrei ka MoRTH, bad ki dkhot ka DRB ka dang don hapoh ka jingtohkit, ka ED kala khot hajir ia u Chief Engineer barim hapoh ka PMLA. Ia ka JV la blacklist haduh 5 snem ha ka 3 tarik Nohprah, 2024, pynksan biang ha ka 17 tarik Nohprah, 2025 bad kyntait ia ka jingkyrpad ban bishar biang ha ka 19 tarik Rymphang, 2026 ha kaba la kdew ba ki jingthoh ha ka ledger ki dei ki nongrim kiba pyni ïa ka jingsiew pisa be-aiñ ban ïoh jingmyntoi, ym dei ba la leh ïa kane na ka jingmut sniew.
U ong ba ha ka mukotduma CMJ University, ki Special PP kila ioh ia ka jingsiew ba T.1 lak bad T.75,000 shisien mihkhmat- palat T.2 lak ha ka shisngi ha ka Iingkashari Magistrate watla kam don kano-kano ka jingdawa pisa kaba heh, hynrei u Gautam um shym la kylli jingkylli halor kane.
Haba kynnoh ba pyndonkam bakla ïa ka rynsan jong ka Bar Association na ka bynta ka jingshun shimet, hadien ba u AG u la ai jingmut ban pan jingpynshai na u Special PP ha ka mukotduma Raja Raghuvanshi, uba dei para jong u Gautam, u Kumar u la kdew ïa ka shithi jong u President ka Bar Association ba 1 tarik Risaw, 2026, kaba la pynpaw ïa ka jingthmu shimet jong u Gautam.
