Shillong, Naiwieng 01 : U Myntri Rangbah Conrad K Sangma ula ai khublei ia u Myntri Rangbah Duh ka ri Narendra Modi bad ka Myntri Pla Tyngka Nirmala Sitharaman hadien ba ka Jylla kala ioh lypa ia ka khajna ba T.688 klur na ka Sorkar Pdeng.
Haba thoh ha X ha ka sngi U Blei, u Conrad ula ong “Nga pynpaw ïa ka jingsngewnguh kaba khraw ïa u Myntri Rangbahduh ka ri, u Narendra Modi, halor ka jingpyllait lypa ia ka bhah khajna kaba dei ban ïasam sha ki Jylla. Kane ka jingkyrshan kaba wan ha ka por kaba biang, kan pynkhlaiñ ïa ka jinglong jingman ha ka liang ka pisa pilain jong ki Jylla, kan pynlah ïa ki Sorkar ban pyndep ïa ki jingkular ha ka pisa pilain bad pynsted ïa ki kam pynroi na ka bynta ka bha ka miat jong ki paidbah.”
U la bynrap, “Nga ai ruh ïa ka jingsngewnguh kaba khraw ïa ka Myntri ka tnad Pla Tyngka jong ka Sorkar Pdeng, ka Nirmala Sitharaman, halor ka jingsngewthuh bad jingpyrkhat ïa ki jingdonkam bad ki jingkyrduh ha ka liang ka pisa jong ki Jylla.”
Kane ka pisa ka dei shi bynta jong ka instalment bynrap kaba kot T.1,09,019 klur, bala pyllait da ka Sorkar Pdeng sha baroh ki Jylla ha ka 31 tarik Risaw, 2026, nalor ka pisa kaba ju ïasam man u bnai.
Katkum ka jingpynbna ba la pyllait da ki bor sorkar, kane ka dei ka sien kaba ar ha kane ka snem mang tyngka ba la pyllait ïa kum kane ka jingkyrshan pisa, khnang ban ailad ïa ki Jylla ban pynsted ïa ki jingpynlut ha ki kam pynroi bad ki jingtei (capital expenditure) shwa ka aiom lehkmen.
Ka bhah jong ka Meghalaya kaba kot T.688 klur la dep thep sha ka account jong ka Sorkar Jylla ha ka Sngi Saitjaiñ.
