Hadien ka jingaipor ba 72 kynta ban pynkut ia ka Contract ka kompani
Shillong, Naitung 15: Ki bor pyniaid ka GVK-Emergency Management and Research Institute hynne ka sngi thohdieng, ka la kyntu ia ki Nongtrei lajong ba kim dei ban iakhih ne pynthut ia ka jingshakri jong ka kompani namar kane kan wanrah ia ka jingjynjar ia ki nongshongshnong, kiba donkam ia ka jingshakri ha ki khep ba kyrkieh (Emergency Service) ha ka pang ka mynsaw.
Kane ka jingkyntu kala mih hadien ba ki Nongtrei kiba don hapoh ka lama jong ka Meghalaya EMRI Worker’s Union (MEMRIWU) kila aipor 72 kynta ia ka Sorkar Jylla ba kan pynkut noh ia ka Contract bala iasoi bad kane ka kompani.
“Ngi shim ia kane ka kali ban kyntu ia baroh ki nongtrei ba kin ym shim ia ka lynti ban pynthut ia ka jingshakri ka ban wanrah ia ka jingjynjar ia ki nongshongshnong ka Jylla kiba donkam ia ka jingshakri ha ki khep ka pang ka mynsaw. Ia kino ki jingeh jong ki, lah ban pynbeit da ka jingiakren” ong u Deepankar Choudhury, u Director ka GVK-EMRI ha Meghalaya lyngba ka kyrwoh bala phah hynne ka sngi thohdieng.
Haba pynpaw ba ka samoi treikam jong ka Tender kala jan kut artad, u Deepanker ula ong b aka Sorkar Meghalaya kala sdang mynta ia ka kam ban khor tender thymmai ha Jylla.
Ka GVK-EMRI kala shakri ia ki nongshongshnong ka Jylla Meghalaya haduh 13 snem tam naduh u bnai Rymphang 2009.
“Ngi ai khublei ia ki Nongshongshnong ka Jylla, ka Sorkar Meghalaya bad baroh ki kynhun kiba la kyrshan ban pynlong ia ka jingshakri jong ka kompani kaba jop. Ngi ai khublei ruh ia baroh ki Nongtrei jong ka GVK-EMRI namar ka jingtrei shitom jong ki ha baroh kine ki snem” ong u Deepankar.
Une u Khlieh ka GVK-EMRI ula pyntip ba ki kali 108 kila ai ka jingshakri haduh 3 lak tylli ki emergency case ha Jylla kaba la pyllait im ia 30000 ngut ki mynsiem briew bad iarap pynkha ruh ia ki khunlung haduh 2500 ngut.
