Shillong, Naitung 15: U Myntri Rangbah ka Jylla Conrad Kongkal Sangma, hynne ka sngi thohdieng, ula pyllait paidbah ia ka Integrated Web Portal jong ka Meghalaya State Public Services Delivery Commission haba ong ba kane ka portal ka dei ka sienjam ban kynjoh ia ka thong ban pynlong ia ka synshar khaddar kaba khuid bad kaba dei na ka bynta u paidbah.
Launched the integrated web portal of the Meghalaya State Public Services Delivery Commission
The portal will greatly complement the implementation of the Meghalaya Right to Public Services Act to improve the overall delivery mechanism of the Govt.@AshwiniVaishnaw @NICMeity pic.twitter.com/UaIyq16KK8
— Conrad Sangma (@SangmaConrad) July 15, 2022
Ia kane ka web portal la pyllait ha Yojana Bhavan, kaba la wan iashimbynta da ki Commissioner, u Chief Commission ka Meghalaya State Public Services MS Rao bad u State Informatics Officer Bah T Dkhar.
Haba kren ha ka jingialang, u Myntri Rangbah ula ong baka Sorkar Jylla kala dep shim ia bun bah ki sienjam ban pyn thikna ba baroh ki Tnad ki dei ban ai ka jingshakri kaba bha, ba janai bad ba pynsuk bha ia ki paidbah.
“Ha kiba bun ki khep, ka jingmut tynrai ban ai ka jingshakri ba bha bad ba sted kala shu kut namar man ka por ka jingpyn leit jingmut ka long eh ha kaban kynjoh ia ka thong bad ban pyntreikam ia ki skhim, ban bud ia ki kyndon bad ki rule haduh ba ngi klet ba ngi don hangne ban shakri ia ki paidbah” ula ong.
U Conrad ula ong ba ka Integrated Web Portal ka dei ka sienjam ban kynjoh sha ka thong ban ioh ia ka synshar khaddar kaba bha bad kaba dei na ka bynta ka bha ka miat bad kaba ai jinghun ia u paidbah nalor kan pynjanai ruh ia ki lad ai jingshakri baroh ha ki Tnad bapher bapher.
U Myntri Rangbah ula pyntip ba ki don 188 jait ki jingai jingshakri kiba dei ban ioh noh kham kloi da u paidbah lyngba kane ka portal haba kyntu ia baroh ki Tnad ba kin bud ia ka jingbuhpor khnang ba kan nym don ka jingpynslem ia ka jingshakri.
Lah ban kdew hangne ba ka Meghalaya Right to Public Services Act, 2020 ka dei ka ain kaba la thaw naka bynta ban ai ia ki jingshakri bala dep pynbna paidbah (notified) sha baroh ki nongshongshnong ka Jylla kat kum ka por bala buh ban pyndep nalor ka jingpynsajia ia ki nongtrei sorkar ki bym lah ban pynbiang ia ki jingshakri.
Kane ka Web Portal ka dei kaba lah ban leh ruh lyngba ki mobile phone na ka bynta ban pynsuk ia u paidbah. Ki paidbah kiba kwah ban pan ia ka jingshakri ki Tnad bapher bapher ki lah ban leit ha kane ka portal http://mspsdc.meghalaya.gov.in.
