Shillong, Naitung 15: U Dr Jack Shankoff, Director ka Centre on the Developing Child ha Harvard University bad uba dei ruh u Nongwad ia ki jingtip ba bniah halor kane ka kam ha satlak ka pyrthei, ula ai ka jingiaroh ia ka Meghalaya Early Childhood Development Mission (MECD) bad ia ka jingthrang jong u Nongialam ka Jylla (Conrad Kongkal Sangma), ka ban long kum ka sienjam ka ban ai mynsiem ia kiwei pat ki Jylla bad kiwei ki Ri ka pyrthei ba kin bud nuksa.
U Dr Shonkoff ula kren ia kane ha ka jingialang jong ka Meghalaya State Capability Forum kaba long myn ha ka 13 tarik Naitung bad kaba la wan iashimbynta da ki Nongthaw Policy bad ki Researcher, ban iamir jingmut ia ka lynti ba kumno ka Jylla kan lah ban kyrshan ia ki jingdonkam jong ki Khunlung naduh ba ki dang don kpoh ka kmie haduh ba kin heh ki san (Early Childhood Development), ba kin long kiba shait ba khlain bad ba lah pynkut noh ia ka jingduk ba hiar pateng la pateng.
Ia kane ka jingialang la pyniaid da u Myntri Rangbah ka Jylla Conrad Kongkal Sangma ha ryngkat ka jingiadon lang u Dr Vinod K Paul uba dei u Paediatricilan bad Dkhot ka NITI Aayog kum u symbud Kongsan. Ia kane ka jingialang la pyniaid da ka Meghalaya State Capability Enhancement Project (SCEP).
Kane ka jingialang kala pynleit jingmut eh sha ka jingpyntreikam ia ka Meghalaya Early Childhood Development Mission, kaba dang shu pyllait dangshen da u Myntri Rangbah ka Jylla. Kane ka Mission ka don haduh lai bynta ha ka jingsumar ia ki Khunlung bad ka Iing ka sem jong ki kata ban pynbiang ia ki bam tei met ki ban pynthikna ia ka jingheh jingsan bha jong baroh ki Khunlung, ban pynkhlain ia ka pyrkhat pyrkhat jong baroh ki Khunlung bad ka jingdon ia ki kynhun ki ban ai jingkyrshan bad ban ai jinghikai ia ki Kmie Kpa.
Ka Meghalaya Early Childhood Mission kala kynthup ruh mynta ia ka jingsam ia ki jingbam tei met sha ki 1500 tylli ki Shnong ka Jylla ki bym shym la shah kdup lang happh ka Integrated Childhood Development Scheme (ICDS) jong ka Sorkar Pdeng. Da kane ka Mission, kumba 50,000 ngut ki Khynnah bad 10,000 ki Kmie kila ioh mynta ia ki jingbam tei met lyngba ki Self Help Group.
U Dr Shankoff uba dei uwei na ki nongkren ba hakhmat duh ha kane ka sngi, ula kren halor ka jingkongsan bad ka jingmyntoi ban ioh naka jingkynshew ha ka kam ban sumar sukher ia ki Khunlung naduh ka kpoh ka kmie. Ula air uh ia ka sakhi ba dang shu lap shen da ka jingstad saian ba kumno ka jingkhuslai ka lah ban pynkylla ia ka bor jabieng bad lam sha ka jingktah kaba jur ia ki khunlung katba ki dang heh dang san.
U Myntri Rangbah ka Jylla Conrad Kongkal Sangma haba kren ha ka jingialang, ula khring ia ka jingmut jingpyrkhat jong ki nongiashimbynta da kaba kdew ba ka Jylla Meghalaya ka dang duna bha ha ka jingdon jong ki lad ki lynti ban pynbiang nadong hadong ia ka jingdonkam ki Nongshongshnong kaba ki ong ka Sustainable Development Goals (SDG) hynrei ki Nongialam ka Jylla kila kut jingmut ban pynlong ia ka Jylla kum ka Jylla ba hakhlieh duh hapoh ka Ri haba phai sha ka jingkiew ka jingim ki nongshongshnong bad ka ioh ka kot.
Kiba la wan iashimbynta ha kane ka jingialang ki kynthup ia ki Heh Ophisar na ka Jylla Assam, Telangana, Tamilnadu bad ki Deputy Commissioner jong baroh ki District ka Jylla.
