Shillong, Naitung 08: U Superintendent of Police ka East khasi Hill District Bah Vivek Syiem u la bthah ia u Sub Divisional Police Officer (SDPO) ban tohkit bad ban aiti ia ka kaiphod hapoh ka shitaiew halor ka jingkynnoh ba ki pulit ka Sohra Police Station ki la pynshitom be-ain ia u wei u samla 19 snem ka rta hapoh phatok.
Ia kane la pyntip da u Superintendent of Police (City) Bah Hubert P Kharkongor.
Haba kren sha ki lad pathai khubor u Bah Hubert u la iathuh ba ha ka 1 tarik Naitung, ka Sohra Police station ka la ioh ka jingujor na ki Rangbah shnong ka Maw-Ki -Syiem Sohra halor une u samla da ba kynnoh ba u la thombor, byrngem byrsit bad kren khlem akor ia u wei pat u briew.
“Halor kane ka Dorbar Shnong Maw ki Syiem ki la khot hajir ia une u samla ban wan sha Dorbar ha ka 28 tarik Jylliew bad 1 Tarik Naitung hynrei u khlem leit mih satia kumta ki la ujor noh da ka ejahar halor kane ka jingjia sha ki pulit ka Sohra PS” ong u Bah Hubert.
U Bah Hubert u la iathuh ba na ka liang ki Pulit haba iohpdiang ia ka jingujor, ki la pyrshang ban kem ia u samla hynrei kim shym la ioh satia namar ba u la phet rieh na kane ka jaka bad dei ha ka 3 tarik Naitung ba ka kmie jong u ka la wan ialam noh ia u sha Police Station.
“Hynrei ha ka 7 tarik Naitung ki pulit ki la ioh pdiang ia ka jingujor na ka kmie une u samla daka ba kynnoh ba u la shah thombor ha ki pulit ka Sohra Police Station. Halor kane, u Superintendent of Police u la bthah ia u Sub divisional Police Officer (SDPO) ban tohkit bad ban aiti ia ka kaiphod hapoh shitaiew” u la ong.
