Ioh rep ki paid Lapangap ha jaka them, ki nong Tahpat halor lum bad ki sharing
Shillong, Jylliew 02 : Ka Sorkar Meghalaya bad Assam, ha ka sngi Ba-ar, kila shim rai ban pynbteng biang ia ka kam rep kam riang ha Lapangap da ka jingpynbeit ia u pud hangno ban rep ki nongshongshnong ka Lapangap bad hangno ban rep ki briew na Tahpat, Karbi Anglong, haba mynjur ruh ba ki nongshongshnong ka thain ki dei ban pynneh ia ka jingshongsuk shongsain bad kiar na kino kino ki kam kba lah ban pynmih ia ki jingkulmar.
Kane ka rai kala mih na ka jingialang High-Level ba kynthup ia ki Nongmihkhmat na ka sain pyrthei, ki Heh Ophisar bad ki Pulit nalor ki nongkmihkhmat na ki District Council ka Meghalaya bad Assam, kaba la pynlong ha Assam Police Camp, ban iakren ia ki jingeh kiba iadei bad ka jingkynad pud ha Lapangap.
Kane ka jingialang ka dei kaba la pynlong kum ka jingpynbteng ia ka sienjam bala shim da u Myntri Rangbah ka Jylla Conrad K Sangma, uba la leit iakynduh bad iakren bad u Myntri Rangbah ka Assam Himanta Biswa Sarma, da ka jingthmu ban wad ia ki lad ki lynti ban lah pynbeit noh ha ka lynti ba jai jai ia ka jingeh kaba mih ha ka thain Lapangap.
Kat kum ka jingpyntip u Deputy Commissioner ka West Jaintia Hills, ka jingialang kala mynjur ba ki nongshongshnong ka Lapangap kin bteng biang ban rep kba ha kjat jong u lum uba mih ka jingiakajia.
U iathuh ba katba ki nongshongshnong ka Tahpat pat, ki lah ban bteng ia ka jingrep ia ki jingthung ba iaid kat kum ka aion kum ka kait, sohtrun, sying bad kiwei ki jingthung halor u lum bad ki sharing.
Haba iadei bad ka kam ban pynbeit bad phiah ia u pud u sam ba shirta ha ka jaka ba don jingiakajia, u Deputy Commissioner u iathuh ba ia kane ka kam la mynjur ban sa shong pyrkhat bad shim rai da ki Committee bala thung da ki Sorkar Jylla.
Une u Khlieh ka District u pyntip ka jingialang kala rai ruh ba ba baroh arliang mamla ki dei ban pynneh ia ka jingshongsuk shongsain bad ki dei ban kiar ruh ban leh ia kino kino ki kam kiba lah ban pynmih ia ka jingkulmar lane ktah ia ka jinglong jingman ka suk ka sain.
Kiba mihkhmat ia ka Meghalaya ha kane ka jingialang ki long u Symbud Myntri Rangbah Bah Sniawbhalang Dhar, Principal Secretary Bah Frederick R Kharkongor, Commissioner & Secretary Bah Cyril V Diengdoh, Secretary Bah Garod LSN Dykes, Chief Executive Member ka JHADC Bah Thombor Shiwat, Deputy Commissioner ka WJH Abhinav Singh bad u Superintendent of Police ka WJH Jagpal Singh Dhanoa.
Kiba mihkhmat ia ka Assam ki long u Dr. Tuliram Ronghang, MLA bad Chief Executive Member ka Karbi Anglong Autonomous Council (KAAC), u Member of Parliament Amarsing Tisso, Additional Chief Secretary (Home & Political) Ajay Kumar Tiwari, MLA bad Executive Member ka KAAC Surjya Rongphar, MLA bad EM ka KAAC Lunsing Teron, ki MLA Habbey Teron bad Niso Terangpi, Deputy Speaker ka KAAC Avijit Kro, ka Deputy Commissioner ka West Karbi Anglong Preeti Kumari bad Superintendent of Police, West Karbi Anglong Dinesh Kumar.
Lah ban pynkynmaw ba ki nongmihkhmat na kine ki shnong kila iashong jingialang ha ka 18 tarik Jymmang 2026, kaba la pynbeit da u Deputy Commissioner bad Superintendent of Police ka West jaintia Hills. Hynrei kane ka jingialang kam shym la lah ban shim rai namar ka jingiapher ki jingpynsngew haba iadei bad ki rukom rep ki ban shah ha ka thain.
U Rangbah Shnong ka Lapangap Bah Deimonmi Lyngdoh ula pynpaw ia ka jingsngewnguh ia u Myntri Rangbah ka Jylla Conrad K Sangma bad ia u Myntri Rangbah ka Assam Himanta Biswa Sarma namar ka jingshimkhia ban wanrah pat ia ka jingsuk hapdeng ki ar Jylla.
U pyntip ba ki nongshongshnong kila kmen ba kila lah ban leit pat shala ka jong ka jaka rep lashai ka 3 tarik Jylliew 2026.
