Guwahati, Naitung 20 : U Myntri ka tnat animal husbandry bad veterinary ka Assam, u Atul Bora hynnin ka sngi ba Ar u la ong ba ka jingpang African swine fever (ASF) ka la sar tyngeh ha ki 22 tylli ki district hapoh ka jylla.
Une u myntri u la ong ruh ba haduh kumba 40,482 tylli ki sniang ki la iap namar kane ka jingpang ASF ha ka jylla naduh ba la lapdien nyngkong eh ia kane ka jingpang ka ba khlain bha ka jingiabit naduh ka snem 2020.Ha baroh haduh 1,378 tylli ki sniang la hap ban pyniap noh kat haduh mynta.
Namar kane ka jingjia haduh kumba 14,005 tylli ki longiing ki ba im da ka ba ri sniang ki la shah ktah jur, ong une u myntri.
Nalor kata u Bora u la ong ba haduh kumba 900 tylli ki sniang ki la iap na kane ka jingpang ASF naduh u bnai Kyllalyngkot 2022.U la ong ba ki la lapdien ia ki 72 tylli ki tyllong ka jingsaphriang jong kane ka jingpang ha kane ka jylla.
Kine ki tyllong ki dei ki ba la saphriang ha ki 22 tylli ki district ka jylla. “Ka sorkar jong ngi ka la hap ban pyniap noh ia kumba 1,378 tylli ki sniang ha baroh ki 27 tylli ki tyllong khnang ban pynsangeh ia ka jingsaphriang jong kane ka jingpang ASF hapoh Assam.Ym shym la don da kiwei pat ki lad ki lynti hynrei tang ban shu pyniap ia ki,” ong shuh shuh une u myntri.
