Nongpoh, Naitung 15 : Lai ngut ki khynnah kila duh iala ka jingim na ka jingshah bat ha ka bording elektrik ha ka shnong Umtangling, kaba hap hapoh ka Umiam Police Station, Ri-Bhoi District.
Kane ka jingjia kala jia hynne ka sngi Balang ha ka por 2 baje nohphai sngi. Kane ka jingjia kala wan jia hadien ka jingdkut jong u sainar elektrik ba 11 KV ha ka surok ba ki dang iaid. Kine ki khynnah kim shym la iohi ia u sainar ba hap bad lam sha ka jingshah bat ha ka bording.
Haba iakren bad u Rangbah Shnong ka Umtangling Bah Bok Nongbsap, la ong ba kine ki khynnah ha ka jingbym tip ba hap utei u sainar elektrik, kila leit iaid sha katei ka jaka bad kila shah bat ha ka bording haduh ban da duh syndon iaka jingim.
U iathuh ba napdeng kitei kiba 3 ngut, uwei u dei u heprit ba dang 11 snem bad u hynmen ba 12 snem.
U Bah Bok u iathuh ba shuwa kane ka jingjia ba sngewsih, ula dep ban ujor sha ka Tnad MeECL ia ka jingdon ki sainar kiba la jan dkut ha katei ka shnong bad ruh ia ka jingsniew u transformer haduh ba ki nongshongshnong kila hap shong dum la shitaiew eiei.
U la kynnoh ba ka MeECL ka khlem shimkhia eiei ia kane ka jingujor.
