Shillong, Naitung 15 : Ka Meghalaya High Court ha ka sngi Balang kala shim jingthoh halor ka kaiphod ba iadei bad ki kam bala leh da ka Sorkar halor ki jaka thang briew, haba pynpaw ba haduh 46 tylli ki jaka napdeng ki 60 tylli bala tyrwa, la dep ban ithuh bad dei mang pisa ia ki.
Haba bishar ia ka PIL bala mudui da ka Seng Khasi Hima Crematorium, la pyntip sha ka Iingkashari ka Chief Justice Revati Mohite Dere bad Justice W Diengdoh ba ki bor district kila dep pynlait mar T.1 lak sha kitei ki jaka bala ithuh.
Kat kum ka kaiphod, ki jaka bala dep ithuh ki kynthup ia 34 tylli ha East Khasi Hills, 3 tylli ha Eastern West Khasi Hills, baroh 6 tylli ha Ri-Bhoi bad 3 tylli ha South West Khasi Hills.
Ka jingpynthikna ia kiwei pat ki jaka ki dang iaid shakhmat bad sa 6 tylli ki jaka kin dang ban ithuh na ka bynta ban shna jaka thang briew.
Halor ki lum jingtei, u Additonal Advocate General ula pan por ban ioh ia ki jingbthah, ia kaba ka Iingkashari kala mynjur.
Ia kane ka PIL la buh ban shong bishar biang ha ka 14 tarik Nailur 2026.
