Shillong, Naitung 16: Ka Jaintia National Council (JNC) bad Jaintia Students’ Union (JSU) ha ka sngi Balang, kala kynnoh ba u Chief Executive Member (CEM) jongka Jaintia Hills Autonomous District Council (JHADC) Bah Thombor Shiwat ula leh kiar ia ka jingsngewkhia bad sngewthuh bakla ia ka jingiakhih ka jong ki pyrshah ia ka projek Shree Cement.
Hadien jongka jingialang kaba kyrkieh, u President ka JNC u Bah Sambormi Lyngdoh ula ong, ba ka jingkren u CEM ban buh jingkylli ia ka jingpynlong ia ka Rally ka long kaei kaei kaba ym donkam.
“Ngi lah pan jingbit na ka ophis jong u Deputy Commissioner. Ngim shim la ioh jubab. Ha ka riti synshar paitbah, ngi don ia la ka hok ban iakhih da kaba jai jai” ong u Bah Lyngdoh.
Ula bynrap ba ka jingkam u CEM ba ym don jingtip eiei ia ka jingiakhih ka long kaba lyngngoh, namar ba ka jingiakhih kadei kaba lah pynlong naduh mynshem snem bad katei ka mat kadei kaba lah pathai ha kylleng.
Une u nongialam ula ong, ba ka jingpynlong ia ka jingiakhih kadei namar ka jingujor jong ka Elaka Nongkhlieh halor ka jingpyndonkam da ka bor ban shim ia ki jaka da u Dolloi khlem ka jingioh jingbit na ki trai jaka.
Ka Elaka Sutnga kala pynapw ruh ia ka jingsngewkhia bad kynnoh ba ka jaka tih ka don 652 hektar, hynrei ka jingpynbna pat ka long tang 217 hektar.
U Bah Lyngdoh ula ong, ba ka Council hapoh jongka Sixth Schedule, kadei ban iada ia ki jaka bad ia ki hok tynrai bad kdew ia ki jingkynnoh bakla jong u CEM ha kaba iadei bad ka NOC.
Da kaba pynpaw ba ka sanad ia ki Dolloi, ula ong, ba yn ym lah ban ai ia kano kano ka NOC khlem ka jingioh jingbit na ka Elaka bad ka Council.
U President ka JSU u Jersom Shylla ula ong, ba ka jingiakhih ka long kaba jai jai bad kadei da ka jingmut ban pynsngew ia ki jingeh jong ki paitbah.
Ula kyntait ia ki jingkynnoh ba ka don ka jingthmu ban pyntieng bad pynsyier bad kdew ba u CEM bad ki EM kila mih ha ka por ba ka khyrdop jong ka Council la khang shwa ba ki nongiakhih kin wan poi.
“Hato ka JHADC kadei ka iing shimet jong u CEM? Ngi wan tang ban aiti ia ki jingpynsngew ia ki jingeh jong ka Elaka Nongkhlieh” ong u Bah Shylla.
Ula ong ba ka ejahar kba la ujor hadien ka jingiakhih hynrei ki sengbhalang kin iakhun pyrshah ia katei lyngba ka lynti jong ka aiñ.
U Bah Shylla ula ai khublei ia ki pulit kiba la lah ban tehlakam.
Kine ki ar tylli ki seng kila ai por haduh ka 20 tarik u Naitung ban leh da kaba tyngeh da kaba weng noh ia u Dolloi bad ban pynduh noh ia ka NOC kaba la ai sha ka Shree Cement.
Lada kam don kano kano ka jingshimkhia, kila ong, ba kin nang pynjur shuh shuh ia ka jingiakhih bad ban dawa ruh na u CEM ba udei ban hiar shuki noh.
