Shillong, Iaiong 11: Ka kynhun ki samla bala pyndep ia ka jingpule Pharmacist bad kiba la Register hapoh ka Jylla, hynne ka sngi Thohdieng, ki la dawa na ka Sorkar ban pynbun ia ki lad ioh kam ioh jam ia kiba la pass ia ka jingpule Pharmacy da kaba seng ia ka Pharmaceutical Industries.
Kane ka kynhun ba lamkhmat da u E Syiemlieh, B Sumer, W Suting bad R Kshiar kala aiti ruh daka dorkhas sha ka Myntri ka Koit ka Khiah ka Kong Ampareen Lyngdoh haba kyntu ban tuklar halor ka jingeh ki samla bala pyndep pule Pharmacist.
Da kaba sot ia ki jingtip ba la ioh lyngba ka RTI, ki la iathuh ba haduh kine ki sngi ym pat don kano kano ka jingthung kam lyngba ka jingpynbna laitkam (Advertisement) da ka Sorkar na ka bynta ki kam Pharmacist hapoh ka Directorate of Health Services.
“Halor kane, ngi kyrpad ïa phi ba phin sngewbha ban sdang ïa ka jingpynrung kam kaba hok bad kaba kynthup lang ïa baroh ki Pharmacist kynthup kiba bei tyngka bad bym beityngka da ka Sorkar ba kin iakhun iaki kam Pharmacist ba lait” kila ong.
Ka kynhun kala ai jingmut ruh ïa ka jingdonkam ban pynbun ïa ka jngdon ki nongtrei Pharmacist katkum ki kyndon ka IPHS ha baroh ki jaka sumar kum ki district hospital, ki CHC, ki PHC bad ki Sub-Centre nalor ban thung khambun ki Drug Inspectors ha man la ki district ha ka Jylla.
