Nongstoin, Jylliew 18 : Ka Synjuk ki Rangbah Shnong ka thain Tynghor, kila pynpaw ia ka jingsngewnguh ia u Symbud Myntri Rangbah ka Jylla Bah Prestone Tynsong, halor ka jingpynbna ban pynskhem ban buh ia ka Rimuliang C&RD Block ha Tynghor haba kynthoh “ka Tynghor ka kham long pdeng ban ia ka Nonglang”.
Kane ka sur ki paid Tynghor kala mih na ka jingialang paidbah ba long ha ka sngi Palei ha Madan Shnong Tynghor kaba la wan iashimbynta lang naduh ki paid Khasi bad Garo.
Ka Synjuk ka ong ba u Symbud Myntri Rangbah ula kren shai ha ka jingalang ba dang shen ha Rambrai ia kaba la pyni ruh lyngba ki durkhih ha ki lad pathai khubor, kaba u ong ba ka Sorkar kan buh ia ka Ophis ka Rimuliang Block ha Tynghor.
“Ngi sngewkmen palat namar ka Synjuk kala iakhun tyngeh ban pynioh ia katei ka Ophis ha shnong Tynghor” kala ong.
Kum ka dak ka jingsngewnguh, ka Synjuk kala phah ia ka kyrwoh sngewnguh lyngba u S Momin bad u Bah Distarborlin Wanniang kiba dei naka Shnong Tynghor.
Ha kane ka jingialang paidbah la wan ban iashimbynta da ki paidbah na ki saw tylli ki Hima kiba kynthup ia ka Hima Nongmynsaw, Hima Jyrngam, Hima Riangsieh bad Hima Nonglang.
Lah ban pynkynmaw ba ïa katei ka Ri Muliang C&RD Block, naduh ba la plie paidbah ha Nonglang, haduh mynta ka dang don hapdeng ka jingïakynad bad ka jingïatan tyllai bad ym pat lah ban pynshisha la kano ka kynhun kan ïoh. Hynrei la shu kut satang ha ki nia ki jutang katba ka kam kat haduh mynta mynne kam pat paw ei ei.
Dang shen ki paidbah ka Hima Nonglang ki la mih paidbah ban pynlong ïa ka jingïalang paidbah, ha kaba ka jingïalang ka la dawa ba dei ban pynneh beit ïa ka Block ha Nonglang kumba la plie mawnongrim naduh ka sngi kaba nyngkong eh.
U bah Distarborlin Wanniang u la ong, “Ngim lah khlem da ai khublei ïa ka sorkar lyngba u BDO u ba la wan ha Tynghor ha ka 10 tarik Risaw 2024, u ba la shimkhia bad sngap ïa ka sur jong ki paidbah”, bad bynrap, “Ka jingdawa jong ngi hapoh ka jingïalam jong u Sordar ka long kaba shongnia bad baroh ki nongïalam jong ki saw Hima ngi ai jingkyrshan ïa ka jingleh u sordar, namar u la maitphang ïa ka ophis kaba skhem jong ka Block hangne ha Tynghor”.
“Ka shnong Tynghor ka dei kaba hapdeng tam lada phai ha baroh ki liang bad ki shnong kiba hap ha kane ka thaiñ. Na Athiabari sha Tynghor ka don 17 kilometer, na Nonglang sha Tynghor ka don 17 kilometer. Kumta ngi sngewthuh biang biang ba ka Tynghor ka dei kaba kham biang tam ban buh ïa ka ophis jong ka C&RD Block kaba skhem”.
