Shillong, Risaw 18 :Ka 5th KIO North East Zone Karate Championship, sa shisien ka la wanphai biang sha kane ka jylla hadien 30 snem, bad ka All Meghalaya Karate-Do Association (AMKA), ka la shimti ban pyniaid ia kane ka jingialehkai ba kan long ka jingiakob kaba iaid beit iaid ryntih bad ban sah jingkynmaw.
Ha kane ka lympung iakop, yn don kumba 900 ngut ki nongialehkai karate lem bad ki nongpyniaid kiban wan ban iashim bynta sha kane ka lympung kaba la buh ban long naduh ka 22 haduh ka 24 tarik mynta u bnai Risaw 2026, ha NEHU Convocation Hall.
Ia kane ka lympung iakhun yn pynlong hapoh ka jingpeit bad khmih ka Karate India Organisation ia kaba la iarap ban bei pisa ia ka da ka tnat jong ka Sports and Youth Affairs, ka sorkar jylla.
Haba iadei bad kane, ka AMKA, hynnin ka sngi Saitjain, ka la pynlong ia ka jingiakynduh lang bad ki nongthoh khubor, ha kaba la don lang naduh u President u jong ka bah Hunlang Lyntan, u Secretary bah Ksan Warjri, nangta ki arngut ki Patron bah Ransom Sutnga bad bah Aiborlang Shabong lem bad u Coach ka kynhun u bah Donboklang Lyngdoh.
Ha kane ka kynti, ia ka Meghalaya yn mih iakhun da kumba 296 ngut ki nongialehkai bad bynrap lang bad na ki 6 tylli kiwei pat ki jylla ka thain shatei lam mihngi ka ri, lait noh ka Mizoram kabala pyntip ba kan nym lah ban wan iashim bynta sha kane ka lympung.
Nalor ki nongialehkai ka AMKA ka la pynbna ruh ia u Mingson Rymbai bad Arjun Sewa, kin long ki head coaches, katba Wandashisha Warjri bad Ronald L Nonglait kin shim ia ka bynta kum ki assistant coaches, team manager Laiarisa Nongrum, Beautiful Mary Mylliem, Rose Mary Tympuin, Junita Rani bad Aihunlang Makdoh, katba Sharailang Nongneng Shanpru yn dei team physiotherapist.
Ki jingiakhun jong kane ka lympung kin long ha ka 23 bad ka 24 tarik, katba ka sngi ba nyngkong , kata ka 22 tarik pat kan dei ka KIO Referee & Coaches Seminar & Examination, kaba hangne na ka liang ka Meghalaya yn iashim bynta da kumba 21 ngut, ban u nongpyniaid ia kane un dei u Premjit Sen, Chairman ka KIO’s Referee Commission.
Ka jingialang plie pyrda ia kane ka lympung kan long ha ka 23 tarik u Risaw ban wan plie ia ka da u myntri ba dei khmih ia ka Sports and Youth Affairs, u bah Wailadmiki Shylla, katba u symbud kongsan un dei u Director ka tnat u bah Sports &Youth Affairs Director, Alertson Nongbri bad ban don lang ruh u Bharat Sharma ba dei u KIO President.
