Shillong, Risaw 19 : Ka sain pyrthei ha Meghalaya ka lah ban sakhi sa kawei pat ka jingkylla kaba khraw, namar lai ngut na ki 4 ngut ki MLA ba dang sah ha ka United Democratic Party (UDP), la ioh jingtip ba ki don jingthmu ban leit iasoh noh sha ka National People’s Party (NPP).
Kat kum ka khubor bala ioh, kine ki laingut ki MLA ka UDP ki dei u MLA ka West Shillong Bah Paul Lyngdoh, MLA ka Mawkyrwat Bah Renikton Lyngdoh Tongkhar bad u MLA ka Mookaiaw Bah Nujorki Sungoh.
Kine ki laingut ki MLA kilah buh leit iakynduh ia u Lamphang ka Iingodrbar Thaw Ain ka Jylla Thomas A Sangma mynta ka janmiet ban aiti ia ki kot ki sla ba iasoh sha ka NPP.
Kane ka sienjam kan nang pynkhlain ia ka NPP kaba ialam da u Myntri Rangbah Conrad K Sangma, ka ban pynkiew ia ka jingdon MLA sha ka 37 ngut ha ka Iingdorbar ka 60 ngut ki Dkhot, bad khate ia ka UDP ban sah satang uwei u MLA.
U President ka UDP bad MLA ka Mairang Bah Metbah Lyngdoh, uba bat ia ka shuki Myntri ba khmih ia ka Tnad Bording, un dei u MLA ba sah marwei ha ka party hadien kane ka jingleit iasoh.
Kane ka jinglong jingman kala wan jia tang da ki taiew hadien ba 8 ngut ki MLA ka UDP kila leit iasoh sha ka Bharatiya Janata Party (BJP). U Lamphang ula pdiang ia kane ka jingiasoh ha ka 16 tarik Risaw bad kyntait ia ka jingujor ban mait kyrteng ia ka jinglong MLA kine ki 8 ngut, kaba la mudui da u Bah Metbah Lyngdoh.
Ka jingiakynduh ki lai ngut ki MLA ia u Lamphang la khmih lynti ba kan ai jingshai ia ka ei ka ba long ba man halor kane ka jingiasoh bad ka jingktah jong ka ia ka jingdon paid jong ki seng sain pyrthei ha Iingdorbar Thaw Ain.
