Shillong, Risaw 19: Ka BJP 18-West Mandal, Shillong ka pynrem jur ia ka jingkynnoh kawang petrol bomb ia kawei ka Fast-food bad ka jingthang ia kawei ka Scooter ha Mawbah ha kane ka jinglehkmen Durga Puja kaba dang iaid shakhmat.
Katkum ka kyrwoh, u nongialam ka BJP-West Shillong Bah Mike Pakynteiñ u la ong, kum kine ki kam thombor, pyntieng pynsmiej bad pynjot ia ki mar ki mata ki long kiba sngewkhia haduh katta katta bad kim don jaka shuh ha ka imlang sahlang kaba suk ba sain.
Ka long kaba sngewsih khamtam ba kine ki jingjia ki la jia ha ka por jong ka lehkmen kaba pyni ia ka jingjop jong ka jingbha halor ka jingsniew bad kaba pyniasoh lang ia ki briew ha ka mynsiem jong ka jingngeit, ka jingiatylli bad ka jingiatylli ha ka imlang sahlang.
“Ngi pynpaw ia ka jingsngewkhia na ka bynta ka bit ka biang jong ki nongshong shnong bad ki jaka khaii ha Mawbah bad ngi ieng ha ka jingiatylli bad baroh kiba shah ktah ha kine ki jingjia.Ym don uwei ruh kiba dei ban im ha ka jingtieng ia kum kine ki kam bym pyrkhat bad ki kam be-aiñ”, u la ong.
“Ngi kyntu ia ki Pulit ka Meghalaya ba kin pynlong ia ka jingtohkit kaba bniah, kaba khlem shah liang bad kaba buh ban pyndep da ka por, ban ithuh ia kiba donkti bad ban leh da ka tyngeh pyrshah ia ki nongleh kam sniew. Ngi kyrpad ruh ia ki bor ba dei peit ba kin pynkhlain ia ki lad jingiada ha katei ka thain khnang ban iada na kino kino ki jingjia kiba sngewsih ha kane ka aiom lehkmen” ula bynrap.
Une u nongialam ka BJP ula ong ruh ba ha kum kane ka por, ka party ka kyrpad ia ki paidbah ba kin long kiba jai jai, ban kiar na kaba pynsaphriang ia ki khubor hamsaia bad ban iatreilang bad ki pulit ha kaban pynneh ia ka suk ka sain.
Ym dei ban ailad ba kum kine ki jingjia kin wanrah ka jingsheptieng, ban pynmih ïa ki jingïakynad ne ban pynthut ïa ka jingïatylli ha ka imlang sahlang ha Shillong bad ka Meghalaya.
“Ka jingsuk, ka jingshngain bad ka jingburom markylliang ka dei ban don, khamtam ha ka por jong ka tamasa kaba rakhe ia ka jingjop jong ka jingbha halor ka jingsniew” ula pynkut.
