Nongstoin, Jylliew 18 : Ka All Meghalaya Labour Association (AMLA), Mawshynrut Circle, kala kynnoh ba ka Khasi Hills Autonomous District Council (KHADC) kala pynieng ia ki khyrdop lum khajna be-ain, kiba don haduh hynriew tylli tang hapdeng ka surok Riangdo haduh Athibari, West Khasi Hills.
Kane ka Seng kala phah ruh ia ka dorkhas sha u Chief Executive Member (CEM) ka KHADC ha ka 17 tarik Jylliew, ba pan jingshai ia ka jingbuh haduh katne tylli ki khyrdop tang ha kane ka surok.
Ka AMLA-MC hapoh ka jingialam u President Bah Banlang Sohphoh bad Secretary Bah Phidius Ryniong, kala leit ruh ban ujor da ka jingthoh sha ka Deputy Commissioner ka West Khasi Hills Hema Nayak, halor ka jingkynnoh ba ka KHADC kala shu pynieng khlem ithuh ithaw shuh ia ki khyrdop lum khajna ha shilynter kane ka surok.
Kat kum ka jingong jong ki, tang ka KHADC marwei kala pynieng haduh 6 tylli ki khyrdop ha surok na Riangdo sha Athiabari ba kynthup ia ka khyrdop lum khajna ia ki kali kit mar ha Mawstieh, Mawshynrut bad ha Chisimpara, Mawshynrut, ka khyrdop talasi Trading Licence ha Athiabari, ka khyrdop lum khajna ia ki kali kit mar kiba mih na ka thain ha Athibari, ka khyrdop lum khajna ia ki kali kiba rung ha Pormathaw, Mawshynrut bad ka khyrdop ka Forest ha Myndo.
Nalor kane, ki don ruh sa 6 tylli ki khyrdop lum pisa jong ki Hima ba kynthup ia 3 tylli jong ka Hima Nongstoin, Hima Jyrngam bad Hima Raingsieh katba 3 tylli pat ki dei tang jong ka Smoke Test ne ban test ia ka jingpynmih tdem ki kali.
Kane ka seng kala pynpaw ba ka jingdon bun tylli ki khyrdop lum pisa ki bym ithuh ithaw shuh ha kane ka surok, kala ktah shaba palat ia ka khaii ka pateng ki paidbah ka thain khamtam ha kum kane ka por ba hiran ka kamai ka kajih.
Kine ki Nongialam ka AMLA-MC kila pyntip ba kila dep ai da ka jingthoh sha u CEM ka KHADC ba pan jingshai ia ka jingbuh ia kine ki khyrdop.
Ki ong ba ka Seng ka maham ba lada ki bor District ne ka Council kim weng noh ia kitei ki khyrdop, na ka liang ka seng kan leit mudui da ka mukotduma hapoh ka Iingkashari jong ka Meghalaya High Court.
U Bah Banlang ula ther tyngeh ia ka KHADC bad ka Sorkar da kaba buh jingkylli ba kumno tang ha kawei la surok, la shah ban pynieng haduh 12 tylli ki khyrdop, 6 tylli jong ka KHADC haba wat tang 2 tylli ruh kila buh palat.
, Mawshynrut Circle, kala kynnoh ba ka Khasi Hills Autonomous District Council (KHADC) kala pynieng ia ki khyrdop lum khajna be-ain, kiba don haduh hynriew tylli tang hapdeng ka surok Riangdo haduh Athibari, West Khasi Hills.){kind=link}