Shillong, Jylliew 18 : Ka Iingkashari Meghalaya High Court ha ka sngi Palei, kala hukum ia ka Sorkar Jylla ba kan ai ia ki jingtip ba bniah halor ka jingpyndait kor CCTV ha ki Police Station hapoh ka Jylla, kynthup ka Laban Police Station, kum shibynta jong ka PIL ba dang iaid halor ka jingkitkhlieh ki Pulit.
Ka Division Bench jongka Chief Justice Revati Mohite Dere bad Justice W Diengdoh, haba shong bishar ia ka PIL bala mudui da u Kishan K Nongkynrih, kala bthah ia ka Jylla ban file ia ka affidavit ba ai jubab hapoh ka saw taiew.
“Ka affidavit kan ai ia ki jingkhein haba iadei bad ki kor CCTV bala pyndait ha Laban Police Station bad kumjuh ruh ha kiwei ki Police Station ba don hapoh ka Jylla, ki jaka ba ki pyndait bad ki video ba don bad kiwei kiwei” ong ka Iingkashari ha ka hukum.
U Additional Advocate General K Khan, uba mihkhmat ia ka Jylla, ula pan por ban pynkhreh ia ka jubab. Ka Iingkashari kala ong ba dei ban ai copy lypa sha u nongiasaid jong u nongmudui ia kane ka jubab.
Ia kane ka kam la buh ban bishar biang ha ka 24 tarik Naitung, 2026.
