Shillong, Risaw 18: Ka Joint Action Committee (JAC) Against Shillong Ropeway ha ka sngi Saitjain ka la pynlong ia ka jingiaid paidbah naduh Last Stop shaduh ka jaka ba sdang ka project Shillong Ropeway, da kaba dawa ba ka sorkar ka dei ban pynkynriah noh ia katei ka projek na Laban Pyllun sha kawei pat ka jaka.
Da kaba pyrta bad rah ki Pla Card ba pyrshah ia ka Ropeway, ki nongshong shnong ki la maham ba kin pynjur ia ka jingiakhih lada ka sorkar kam jubab hapoh 10 sngi.
“Ngi la ai por 10 sngi ka ia ka sorkar ba ka dei ban pyrkhat biang halor kane ka projek bad ban rah shawei pat ka jaka. Kane kam dei ka jaka kaba biang ban long kum ka jaka jngohkai pyrthei,” la ong ka Secretary jong ka JAC ka Dr Linda Marbaniang.
Ka la bynrap, “Ngi la ai por ia ka sorkar 10 sngi ban shim ia ka rai. Lada kim sngap ia ngi, ngin pynjlan ia ka jingiakhih jong ngi. Ngim kwah shisha ban iakhih hangne, kane ka Project kam dei ka jingmyntoi ia ki paidbah hangne. Ngi ki nongshong shnong ngin sa mad jingeh.”
Ka Dr Linda ka la ong ba ka JAC kan sa rai, kan leit tied ne em iaka jingkhang jong ka Meghalaya High Court lada ka Sorkar kam shimkhia ia ka jingdawa.
“Ngin hap ban shong jinglang bad pyrkhat kaei ka sienjam kaba hadien ngin shim” kala ong.
Haba kyntait ia ka jingkam jong ka sorkar ba kam don kano kano ka jingktah ia ka mei mariang, ka la ong ba ka jingpom ia ki dieng na ka bynta katei ka projek ka la dep ban wanrah ia ka jingkyrduh um ha katei ka thain.
“Ngi hap ban sngewthuh shai. Phi lah ban ong ba kam don jingktah ia ka mariang. Phi sah ha Shillong. U slap uba ngi ju ioh um dei shuh kum mynshwa. Ki la pom ia ki dieng bad kane ka la ktah ia ka jinglong ka suinbneng. Haba ym don slap, ym don um. Ki tyllong um hangne kin sa tyrkhong noh,” ka la ong.
Halor ka jingtyrwa ban ai jaka ban thung ding kum ka bai lutksan bala pom iaki ding, ka la ong, “Nga sngewsih shibun, ngim don ia kata.”
Ka Dr Linda ka la ong ba ka JAC ka lah ban pyrkhat ban shim daka sienjam ban pynlong daka jingshah thngan kum shi bynta jong ka jingiakhih.
Haba batai halor ka jingpynslem jong ka JAC ban mih pyrthei ban iakhih pyrshah iaka Project, ka la ong ba ka Sorkar la buh ia ki nongshong shnong ha ka jingdum bad ym shym la pynlong ia ka Public Hearing.
“Haba ki sdang, kim shym la khot ia ka Public Hearing. Ngim tip. Ngim pyrshah ia ka roi ka par. Hynrei hadien ba ki la pom ia ki dieng, ka la don ka jingduna um ha man la ki jaka. Ngi la sngewthuh ba ka dei namar kane,” ka la ong.
“Ka la shim por ia ngi ban mih madan namar ngi la hap ban leit sha ki tnad bapher bapher ban wad ia ki jingshisha. Ngi la hap ban file RTI, ban ioh ia ki kot ki sla. Ngim lah ban mih madan ban iakhih khlem ki kot ki sla bad khlem ka jingpynshisha,” ka la bynrap.
Ka la buh jingkylli ruh kumno la pyniaid iaka jingtei khlem ki jingbit ba donkam.
“Phim don wat ia ka NOC, phim don wat ia ka trading license hynrei ka kam kala iaid. Hato ka long kaba dei. Phi la iaid pyrshah ia ka ain bad ka ain jong u briew. Kaba kham shyrkhei ka long ba phi la iaid pyrshah ia ka ain u Blei uba la ai ha ngi ia une u Lum ban pynneh pynsah. Wat ktah ia kane namar une u lum u long kaba kyntang”.
Da kaba kynnoh ia ki 7 tylli ki Dorbar Shnong ba ki la shukor iala ki nong shong shnong, ka la ong, “Ki la leh ia kane ha lyndet jong ngi. Kim shym la pyntip ia ngi, kim shym la khot ia ngi na ka bynta ka Public Hearing, kim shym la iakren bad ngi la ngi kwah ne em ia kane ka Project. Ka dei ka jinglehbein iala ki nong shong shnong”
Ka la ong ba ka JAC ka kloi ban leit sha ka Public Hearing lada khot da ka sorkar.
