Shillong, Naitung 03: U Myntri ka Tnad Public Health Engineering (PHE) Bah Renikton Lyngdoh Tongkhar ula pynpaw ia ka jingbym sngewhun halor ka jingpyntreikam ia ka Laitkor Greater Water Supply Scheme (LGWSS).
“Ngam sngewtynnad satia ia ka jingiaid ka kam bad nga la rai ban sa khot jingialang lashai ka sngi nyngkong namar ngam kwah ban iohi ba ki paidbah kin mad ia ka jingjynjar na ka jingbym lah treikam u Contractor” ong u Bah Renik hadien bala dep jurip ia ka Project ha Laitkor.
U Myntri ula maham ruh ban leh eiei pyrshah ia ka jingtrei suki bad ong “Ngin leh eiei beit wat haduh pud ban pynkut noh ia ka kam ruh. Lada u Contractor um don mon, ngan kyntu ia u ban iehnoh ia ka kam bad ieh noh ha ka Tnad ba kan wad da kawei pat ka lynti namar ngim lah ban shu ailad ba kan jia kumne”.
Ka Laitkor Greater Water Supply Scheme kaba la mang T.28 klur, kala sdang treikam naduh u Naiwieng 2020 bad la buh por 2 snem ban pyndep ia ka.
“U Contractor ula dei ban pyndep ia mynta la kumno kumno ruh kumba 70% ka kam hynrei haba ngi leit jngoh, ngi lap ba wat tang 10% ka kam ruh kam pat dep. Tharai kumba T. 30 lak naka T.28 klur la pynlut haduh mynta” ula ong.
U Myntri ula ong ruh baka daw ba bun ki project kim lah ban dep hapoh ka por bala buh ka dei namar ka jingpynslem jong ki Contractor, uba hadien pat un sa kyrpad ban pynkiew ia ka dor.
“Ta ka daw, shuwa ba kan dier ka por, nga la rai ban pynlong ia kane ka jingjurip. Ngan iai bteng ban leh ia kane kum u Myntri. Nga hap shim ia ka jingkitkhlieh ban peit ba baroh ki Project bala ai pyntrei ki dei ban dep hapoh ka por bala buh” ula ong.
