Shillong, Naitung 03: U Director General of Police (DGP) ka jylla u Dr LR Bishnoi u la pyntip ba ka tnad pulit kala dep ban ithuh haduh 15 tylli ki jaka haka nongbah Shillong kiba jur bha ka jingdheng kali bad ki pulit kin pynkhreh iaka Comprehensive Plan ban pynduna ia kane ka jingeh hapoh ka Nongbah.
“Ka Tnad Pulit kala dep ban ithuh ia ki 15 tylli ki jaka kiba jur bha ka jingdheng kali hapoh ka Nongbah haba ianujor bad kiwei pat ki jaka” ong une u Khliehduh ki Pulit haba iakren bad Ka Shlem.
U la ong, kala don ruh ka jingeh khamtam haba kila don ki nongdie madan kiba la pyndonkam ia ki bynta jong ka surok, kaba la pynsuki iaka jingiaid ki kali bad kane kala pynmih pat iaka jingdheng kali.
Une u heh pulit ka jylla u la ong ba ki jaka kiba don iaka iew ka hat, ki jaka sah briew, ki skul ki dei ki jaka kiba jur bha ka jingdheng kali haba pyntip “Ka Tnad mynta ka dang dang pynkhreh ia ki Comprehensive Plan ban leh eiei ha kaban lah pynduna noh ia ka jingdheng kali” ula ong.
Haba kylli la ka tnad pulit ka don ia ka jingthmu ban pynbun ia ki pulit Traffic ban pyniaid ia ki kali, naka liang u Bishnoi u la ong “Ngan sa khmih bniah bad yn sa iasyllok ia kane ka kali bad ki pulit ka tnad Traffic bad kiwei pat ki heh pulit bad hadien kane, ngin sa phah iaka jingtyrwa katkum ka jingdonkam sha ka sorkar jylla”.
U Dr Bishnoi ula ban jur ba ka Jylla kala donkam ban pyndonkam noh da ki kor technology ha ka kam pyniaid kali ha Jylla khamtam ha Nongbah Shillong khnang ba yn lah ban weng ne pynduna ia ki jingeh u paidbah ha ka leit ka wan.
Ka Thain Police Bazaar-Khyndailad ka dei kawei ka jaka kaba jur tam ka jingdheng kali khamtam ha ki long long trei ki nongtrei sorkar bad poi wai trei bad la ju lap ba bunsien ki jingdheng kali ka dei na ka daw ka jingiaid bad jingpynieng khlem akor jong ki bos saw.
Ki jingiakren ki la mih ruh ba ka Nongbah Shillong ka la don mynta da ka rel ba kamai khamtam ha ka thain Khyndailad namar ka jingwan poi marbud marbud ki bos saw ha ka juh ka por la kumba iaid ka rel.
Haba kylli ia kane, u SP Traffic ka East Khasi Hills u S Bamaniya u la ong, “Ngi la dep iakren halor kane ka mat bad ka sorkar jylla bad yn sa pynduna noh ia kine ki bus bad kin ioh ban iaid noh tang ha ki katto katne ki bynta”.
