Nongpoh, Nailur 03: U Deputy Commissioner ka Ri-bhoi Dr Abhishek Saini ha ka sngi Palei u la kular ba ka bor District kan sa shimkhia iaka jingeh jong ki nongniah trok halor ka jingbym ioh lad jong ki ban pynïeng ïaki trok harud Surok jong ka National Highway 6.
Kane ka jingkular u DC kala mih hadien ba ka Meghalaya Commercial Truck Owners and Driver Association (MCTODA) ka la leit buh jingthoh sha u Deputy Commissioner halor ki jingbym don ka jaka ieng ki trok kiba iaid lyngba ka surok four-lane ha Ri Bhoi District, khamtam kito ki trok kit mar kiba wan na ki lynti kiba jngai.
Dang shen ka MCTODA ka la leit ai dorkhas sha ka ophis u Depyty Commissioner kaba pynpaw ia ka jingeh jong ki nongniah trok halor ka jingpyntreikam ïaka hukum na Supreme Court ba ym shah iaki trok ban pynïeng ia ki kali ha shilynter ka NH6 naka bynta ban wanrah iaka jingshngaiñ ïaki paidbah kiba leit ba wan.
Haba kren sha ki lad pathai khubor u Dr Abhishek Saini u la iathuh ba ka bor shynshar district kan shimkhia halor kane ka jingeh jong ki nongniah trok ban pynioh iaki ïaka jaka pynïeng kali lane ka Parking bay ha kiba bun ki bynta jong ka Surok bah ha Ribhoi.
Ula Pynpaw ba ka jingdawa jong ka MCTODA ka dei kaba don Nongrim, namar naduh ba pyntreikam ïaka hukum jong ka supreme court, ki nongniah trok kim ioh jaka shuh ban pynïeng iaki trok lane ban shong jah thait haba wan na ki lynti kiba jngai.
U la iathuh ruh, ba ka Road Safety Committee, kan sa ïakren sani halor kane ka jingeh ki nongniah trok khnang ba yn lah ban weng noh ia ki bad ban wanrah ïaka jingsuk ha baroh ki liang.
U la iathuh ruh ha ka jingshisha na ka liang ka NHIDCL bad ka NHAI ki la pynkhreh ban shna ia ka jaka ieng jong ki trok (Parking Bay), hynrei ka jingeh ka mih ba don ki briew kiba klun jaka ha kaba na ka liang ka bor district ka la dep phah da ka shithi sha ki trai jaka ba ki dei ban weng noh ia ki jingtei jongki khnang ban ioh ban shna ia kine ki jaka ieng jong ki trok harud kane ka surokbah.
U pyntip ruh ba ka bor district kan sa khot ia ka jingialang ba kyrkieh iaka NHIDCL, NHAI bad ka tnad transport, ka tnad Pulit, ki trai petrol Pump, lem bad ka MCTODA ban ia kren halor kane ka kam.
U Deputy Commissioner ula iathuh ruh ba naka liang ka Ophis kan sa ia kren bad ki trai petrol pump ba kin ai jaka pynïeng trok kaba shipor katba ka jingiakren ban pynbeit ia kane ka kam ka dang iaid. Ula pyntip ba un sa iakren ruh bad u Deputy Commissioner ka Kamrup district ban ailad iaki trok ban rung lyngba ki No Entry khnang ba kin ioh ban pynïeng ïaki truck ha ki katto katne tylli ki petrol pump katba ym pat lah ban shna ia ki Parking Bay kiba tikna.
