Shillong, Naiwieng 05 : Da ka jinglait thylli ka shuki MP ka Lok Sabha na Shillong, ka Sorkar Jylla ha ka sngi Palei, kala shong bishar ia ka jinglong bala khreh ka Jylla ban pynlong ia ka elekshon shiteng samoi, haba pynleit jingmut ia ki jingdonkam ha ki Polling Station.
Ia kane ka jingialang bishar kam la pyniaid da u Chief Secretary ka Jylla Shakil P Ahammed.
Haba kren hadien ka jingialang, u Chief Electoral Officer (CEO) Dr BDR Tiwari ula ong ba ki bor treikam jong ka Jylla kila long kiba la khreh bad shu ap satang ia ka jingpynbna jong ka Election Commission of India (ECI).
“Kat kum ki jingdonkam, ngi la long kiba la khreh ban pynlong ia ka elekshoh shiteng samoi ha kano kano ka por ba pynbna da ka ECI” ong u Tiwari.
U iathuh ba ia ka jingialang la pynlong na ka bynta ban pynthikna ba baroh ki jingdonkam kiba kongsan kin long kiba la biang lypa hashuwa ka sngi thep vote.
Ki Tnad kiba khmih ia ka umbam umdih, ka painkhana, ki miej ki shuki, ki ramp, ka pule puthi, ka rural development, PHE bad Power kila iashimbynta ha ka jingialang.
U Chief Secretary ula bthah ia ki ban buh hakhmat eh ia ki kam ba donkam ha ki polling station, kynthup ka jingpynpoi bording elektrik ba shipor lyngba ka MePDCL.
Haba kylli lano ka elekshon shiteng samoi kan long, u Tiwari ula ong “Kan shong ha ki (ECI), kumta ngim lah ban kynthoh eiei. Ngi la dep pynkhreh lut nadong hadong. Ha kano kano ka por ba ka ECI ka rai, ngin sa pynlong ia ka”.
Haba batai ia ka jingbuh por, ula ong ba kam don satia ka jingbuhpor ba thikna ba 30 lane 45 sngi.
“Shisien ba lait thylli ki shuki, ka ju long barabor ba dei ban pynlong ia ka elekshon hapoh ka hynriew bnai ba lait thylli ka shuki, hynrei lada don kino kino ki jingeh bad kiwei kiwei ki jingdonkam, ki lah ban shim kham slem” ula ong.
