Shillong, Naiwieng 05 : Ka Meghalaya kala jam shakhmat ha ka lynti kaba dei ban pynlong ia ka 39th National Games 2027, ong ka Chairperson ka Games Technocal Conduct Committee (GTCC) Sunaina Kumari ha ka sngi Palei, hadien ka jingleit jurip ba saw sngi ia ki jaka ialehkai ha Shillong bad Jowai.
“Ngi ihun bad ka jingiaid jong ki kam haduh mynta” ong ka Kumari ha ka jingiakynduh bad ki lad pathai khubor ha Shillong. “Ngi la leit jurip ia katto katne ki madan ialehkai ha Shillong bad Jowai bad ngi sngew ioh mynsiem ban iohi ia ka jingiaid ki jingtei bad ki jingpynkhreh bala shim da ka Jylla”.
Ka kynhun ba 5 ngut ki dkhot ka GTCC, bala thung da ka Indian Olympic Association (IOA) ha ka 14 tarik Risaw hapoh ka jinglong Chairman ka Sunaina Kumari, kala wan sha Meghalaya naduh ka 2 haduh 5 tarik Naiwieng ban jurip ia ki jaka ialehkai bala tyrwa ban pynlong bad peit thuh ia ki jingpynkhreh.
Ka Kumari kala ai ka jingiaroh ia ka jingiatreilang hapdeng ki Tnad, ki borkhmih ka tnad Sports bad kiwei ki kynhun ba don bynta.
“Baroh kila iatreilang ban kynjoh ia kawei ka thong kata ban pynthikna ia ka jingjop ha ka jingpynlong ia ka Games” kala ong bad bynrap “Ngi ai jingiaroh ia ka Sorkar Jylla bad ka Tnad Sports namar ka jingiatreilang bad ka jingpynbiang nadong shading”.
Kala ai khublei ia u Myntri Rangbah Conrad K Sangma, ki Symbud Myntri Rangbah, u Myntri kam ialehkai, u Dr Vijay Kumari bad kiwei kiwei.
Ka Sorkar Jylla kala tyrwa ban pynlong haduh 39 tylli ki jait jingialehkai ha kylleng ka nongbah Shillong, Jowai bad Tura. Hynrei ia ka thup, ka dang long tang ka jingpynbeit, bad ia ka rai ba khatduh kan shong eh ha ka IOA ha ryngkat ka jingiasyllok bad ka GTCC.
Ki jingialehkai bala tyrwa ban pynlong ha Jylla ki kynthup ia ka archery, athletics, aquatics, badminton, basketball, boxing, canoeing and kayaking, cycling, fencing, football, golf, gymnastics, hockey, judo, kabaddi, karate, lawn bowls, modern pentathlon, netball, rowing, rugby, shooting, squash, sailing, triathlon, table tennis, tennis, taekwondo, volleyball, weightlifting, wrestling, wushu, yogasana, arm wrestling, Muay Thai, sport climbing bad softball.
Ka jingkynthup lang ia ka taekwondo ruh kan dei ka mat kaba shim rai khatduh da ka IOA, haba pyrkhat ia ka jingdon bun ki nongialehkai ka Jylla.
Ia ki jingialehkai la tyrwa ban pynlong ha kylleng ki jaka kynthup ka JN Sports Complex, Shillong Golf Club, NEHU campus, Umiam Lake bad kiwei kiwei ki madan ha baroh lai tylli ki sor ka Jylla. La tyrwa ia ka JN Sports Complex ban long ka jaka ban plie paidbah ia kane ka lympung ialehkai.
