Shillong Naiwieng 05: Ha ka jingrakhe Holi ha u snem ban wan, ka Sunburn Arena kan wan ïalam biang sa shisien ïa u Martin Garrix sha India na ka bynta ka jingïaid lynti kaba 10 sngi ha u bnai Lber 2027, kaban pynkylla ruh ïa kane ka tamasa jong ki rong ki rup sha ka jingrakhe kyrpang ïa ka put ka tem ha ka ri baroh kawei, ka jingpynshongshit kaba palat liam bad da ka bor kaba nylla.
Ka jingïatreilang hapdeng ka Sunburn Arena bad u Garrix kaba la wanrah bunsien ïa ka tem ka put bad ka shad ka kmen kaba sah kynmaw tam hapoh ri India, sa shisien pat kin pynkiew arshah ïa kane, da kaba rah ïa ki jingtem jingput kiba pawnam tam jong u, ki jingpynkhreh kiba pynshongshit bad kiwei kiwei kiba phylla ha satlak ka ri. Ha kane ka kynti, ka madan shad ka don kylleng kylleng, bad ka tamasa Holi ka dei ka daw ban shad laitluid.
U Martin Garrix un sdang ia ka jingpynshongshot ia ki paitbah ha nongbah Ahmedabad ha ka 10 tarik u Lber, kane ka jingïaid lynti kan phai khmat sha Bhubaneswar ha ka 12 tarik u Lber, ha Chennai ha ka 13 tarik, ha Bengaluru ha ka 14 tarik, ha Shillong ha ka 16 tarik, ha Kolkata ha ka 17 tarik, ha Hyderabad ha ka 19 tarik, ha Delhi NCR ha ka 20 tarik, ha Mumbai ha ka 21 tarik bad yn pynkut ha nongbah Pune ha ka 22 tarik u Lber 2027.
Ki nongkyrshan kiba thrang ban long shi bynta jong kane ka jingrakhe kyrpang, ki lah ban pynrung kyrteng kham kloi noh ïalade naduh ka 4 tarik u Naiwieng 2026, ha ka por 5 baje janmiet ha ka Martin Garrix page. Ka Registered User Pre-Sale kan sdang ha ka 16 tarik Naiwieng 2026 ha ka por 12 baje mynsngi, ka ban bud pat sa tang na ka bynta ki RuPay Cardholder Pre-Sale ha ka por 12 baje mynsngi ha ka 17 tarik Naiwieng 2026. Ka General On-Sale na ka bynta kane ka jingïaid lynti kan plie ha ka por 12 baje mynsngi ha ka 18 tarik Naiwieng, 2026, tang ha ka rynsan BookMyShow, kaba dei ka rynsan pynbyrngia kaba pawam tam jong ka ri India.
U Martin Garrix u la ong, “Ka ri India ka dei ka bynta kaba kongsan eh jong ka jingïaid lynti jong nga, bad ka jingieid bad jingkyrshan kaba nga la ïoh pdiang na kane ka ri ha kine ki snem kiba la dep ka long kaba khraw haduh katta katta. Nga la ju wan sha India la palat shiphew snem mynta bad nga la leh bun tylli ki show kiba ngam lah shuh ban klet. Ban wanphai biang na ka bynta ka jingïaid lynti sha ki 10 tylli ki nongbah bad ban rakhe ïa ka tamasa Holi ryngkat bad kumba 2 lak ngut ki briew ka kyntiew ïa kane baroh sha kawei pat ka bynta kaba thymmai!! Nga la thrang dik dik ban ïohi ïa baroh bad ban ïa thaw lang ïa bun tylli ki kam sah kynmaw.”
U Karan Singh, u CEO ka Sunburn, ula ong, “U Martin Garrix bad ka rynsan EDM ha India ki don ïa ka jingïaid lynti kaba la nang khie nang san katba nang ïaid ka por, ha kaba ka nang kyntiew shuh shuh ïa ka kyrdan man ba u wan sha India. Katto katne ki prokram kiba sah jingkynmaw tam jong ka Sunburn Arena kidei bad u Garrix bad kane ka jingïadei jongki ka kham palat ban ïa ka put ka tem. Da kaba wan ïalam biang ïa u na ka bynta ka jingïaid lynti sha ki 10 tylli ki nongbah ha ka tamasa Holi, kaba dei ka jingrakhe ia ka riti dustur kaba phalang tam jong ka ri India, nga sngew ba kadei ka lynti kaba biang tam ban pynïaid shakhmat ïa kane ka jingïaid lynti”.
Ula ong “Ka Holi kadei shaphang ka jingïalum lang bad jingrakhe khlem kino kino ki jingkhang bad kam don da kawei pat ka lynti kaba kham bha lait na ki sur tem sur put jong u Martin bad ka bor ka iktiar jong ka Sunburn Arena. Ngi long kiba la kloi ban pynshongshit arshah ha baroh 10 tylli ki nongbah”.
