Shillong, Nailar 22: Ka Youth Wing ka United Democratic Party (UDP) ha ka Sngi Thohdieng kala dawa na ka Sorkar Jylla ba ka dei ban pyllait noh mardor ia ki nongialam ka KSU kiba shah kem bad ban khot iakren noh ia kane ka Seng ban wanrah biang ia ka shongsuk shongsaiñ ha ka jylla.
Ha ka kyrwoh, ka UDP youth wing kala pynrem jur ia ki kam thombor kiba la jia ha ka por ba ka KSU ka dang pynlong ia ka Black Flag Bike Rally ha ka 19 tarik mynta u bnai, hynrei kala kynthoh tyngeh ruh ia ka rukom leh ki pulit ban thom da ka bor ha ka por shiteng synnia ia ka ophis treikam jongka KSU.
“Ka UDP State Youth Wing kala pynpaw ruh ia ka jingsngewsih halor ki jingjia kiba la jia ha ka Rally kaba la pynlong da ka KSU bad pynrem jur ia ki riewshimkabu kiba la pynkhein ia ka hok longbriew manbriew” la ong ka Youth Wing.
Kala ong ba ki pulit kila dei ban ai ia ka jingpahara ha ka por ba pynlong ia ka Rally kumba la ju leh haba don kino kino ki rally da kaba iaid ryngkat lang.
“Hynrei kaei kaba sngewpangnud bha kadei ka rukom leh donbor jong ki pulit ia ka ophis treikam jong ka KSU da kaba siat da ka lyer pynsat khmat bad ban rung jubor, hadien ba ki lah dep ban kem ia ki nongialam, khamtam haba ka ophis kadei kaba don ha ki jaka sah ki nongshong shnong bad hajan ka hospital” kala ong.
Ka Youth Wing, kaba la ialam da u Chief Youth Organiser u Bah Auguster Jyrwa bad u Joint Secretary u Bah Desmond KL Mawlong, kila pynpaw ba ki nongialam ka KSU ki lah dep ban pynshai ba kim pdiang ia ka kam iaumsnam bad kila tyrwa ruh ban iatreilang bad ki bor district bad ki pulit ban ithuh ia kito kiba donkti.
“Halor katei, ngi sngew ba ka rai ban set phatok ia ki nongialam sha Tura bad Williamnagar ka long ka bym sngewdei” kila ong.
Haba buh jingkylli ia ka jingthmu jong ka Sorkar, ka Youth Wing kala ong, “Ka kamram jong ka sorkar kadei ban wanrah ia ka jingsuk, hynrei kala theh pynban da ka umphniang petrol ia ka ding, da kaba leh kumtei. Hato ka sorkar ka pyrshang ban tap eitmiaw ia ki jingdawa jong ka KSU?”
“Kumta, ka UDP State Youth Wing ka kyntu ia ka Sorkar ban khot mardor ia ki samla pule ban iakren hadien ba kala wad ia ki lad ki lynti ban pyllait ia ki nongialam, khnang ba kiei kiei baroh kin iaid ryntih noh bad ba ka jingsuk bad jingshngain kan neh biang ha ka jylla” kila bynrap.
Ka Youth Wing kala pynpaw ruh halor ka jingshah khang ki kali na Meghalaya ha Jorabat bad ki jingbyrngem ban beh noh ia ki samla pule ka Meghalaya kiba don ha Assam.
“Ka jingkhang ia ki kali Meghalaya ha Jorabat kala ktah ia ka leit ka wan bad ka jingbyrngem ban beh noh ia ki samla pule ka Meghalaya na Assam kan pynmih ia ka jingeh, lada ka sorkar kam shimkhia thikna noh mardor ia kane ka kam” la ong ha ka kyrwoh.
 ha ka Sngi Thohdieng kala dawa na ka Sorkar Jylla ba ka dei ban pyllait noh mardor ia ki nongialam ka KSU kiba shah kem bad ban khot iakren noh ia kane ka Seng ban wanrah biang ia ka shongsuk shongsaiñ ha ka jylla.){kind=link}