Shillong, Nailar 21: Ka jingiakhun hapdeng ka Mawlai Sports Club bad ka Shillong Lajong FC ka la kut ha ka jingiakhaid da 0-0 kol ha ka jingiakhun Shillong Premier League 2026 ba la long hynneka janmiet ha SSA Stadium, Polo.
Ki ar kynhun ki la rung sha ka madan iakhun da ka jingkyrmen ba la kumno kumno kin ioh ba kin khur ia ka jingjop ryngkat bad ka lai point.
Pynban wat ha ki jingiakhun tyngeh bha ha madan, ki ar kynhun ki la hap ban shu hun noh ban shu ia sam ia ka point, kampher wat haba ki sngewthuh ba nangne pat sha khmat, ka jingiakhun kaban wan jong ki, kan long kaba ba eh bad ba nang kham jwat lada ki thrang ban beh sha ka thong , namar ha kane ka samoi ka jingpyniakhun ia ka SPL hi ka long beit tang shi kylla (single leg).
Ha kane ka jingiakhun, ka Mawlai ka don tang kawei ka jingkylla haka kynhun ha kaba u Lovingstar Suting u la wan ba un mihpli ha ka jaka ka jong u Samlang Rympei, katba na ka liang ka Lajong, ka don haduh lai tylli ki jingpynkylla ha ka thup ialehkai ha kaba u Badondor Marbaniang, Freddy Jyrwa bad Banshanskhem Kharsyntiew ki la ioh ban mih naduh kaba sdang ha ka jaka jong u Emanbha Marbaniang, Rimankhraw Kharumnuid bad Lakpa Lama.
Kane ka dei artad ka jingiakhun ba khatduh jong ka kylla ialehkai kaba ar (second round) jong ka SPL 2026, ha kaba don saw tylli ki kynhun ba la ioh ban khur mar saw point, hynrei ka Mawlai ka long kham hakhmat namar ka jingiapher ha ka jingthep kol ( goal difference +5 ) kaba biang pura ia ka ba kan bat ia ka kyrdan ba halor duh.
Lashai ka sngi ka jingiakhun kan long pat hapdeng ka Langsning FC yrshah ia ka Rangdajied United Fc kaban sdang ha ka por 6 baje janmiet.
