Shillong, Nailar 21 : U Nongialam ka Liang Pyrshah Dr. Mukul Sangma ha ka sngi Thohdieng, ula kynnoh ia ka Sorkar Jylla halor ka jingsniew ka suk ka sain ha Shillong hadien jong ka rally thuk thuk ka KSU kaba la kylla sha ki kam thombor, bad pynbud da ki jingjia kawang petrol bomb bad thang kali.
U Mukul ula ong ba kine ki kam thombor kim dei kiba shu jia syndet syndet hynrei ki dei namar ka jingbitar jong ki Seng bhalang namar ka jingjied ka Sorkar ban sngap jar ia ki ishu bala sahteng la slem jong ki.
“Lada phi peit bha ia ka jingsdang bad kumno ka poi sha kaba kut ha ka sngi ba sdang kane ka jingjia, ngi la iakynduh ia kum kine ki jingeh ha ki por bala leit noh haba ki jingdawa ki mih na ka bynta ka bha ka miat ki paidbah da ki kynhun bapher bapher bad sengbhalang” ula ong.
“Ka long kaba donkam ia ka Sorkar ban shimkhia ia man ki jingdawa. Hato ka Sorkar kam don ha ka khep ban sngewthuh ia ka jingheh jong ka jingbitar kaban long ka jigmih kaba kut jong ka jingbym sngewthuh ha ka por ba pynsngew ia kine ki jingeh” ula ong.
Haba shim ia ka jingjia ba 19 tarik kum ka jingpulom ba pura ha ka jingtreikam ki bor Sorkar, ula ong ba ka Sorkar ka don pahuh ia ka por bad ki briew ban pyrkhat lypa ia ka jingmih ki jingkulmar.
“Kam lah long ia ka Sorkar ban tip ia kaei kaba jia ha ka sngi ba jia kane ka jingjia? Lada ia ka jingbit lah dep ban ai na ka bynta ka rally, hato kam donkam mo ban pyhnmih jingbthah sha ki paidbah? Ka Sorkar ka don ia baroh ki kor ki bor ban lum ia ki jingtip bad ban buh lypa ia ki lad jingiada. Kaei kaba jia kam dei satia ban jia” ong u Mukul.
Une u Myntri Rangbah barim ka Jylla ula maham pyrshah ia ka jingpynman ia kane ka jingjia kum ka jingiakynad hapdeng ki Jaidbynriew lane hapdeng ka Meghalaya bad Assam.
“Ka long kaba donkam bha ban nym ailad ia kane ka jingjia ban pynwandur ha ka rukom kba lah ban ktah na baroh ki liang. Kam dei ka jingiakajia hapdeng ki briew ka Meghalaya bad Assam. Ka dei ka jingjia ba bym sngewtynnad kaba jia namar ka jingpulom treikam ka Sorkar Jylla” ula ong.
Halor ka jingshah khang ki kali ha khappud Assam-Meghalaya, u Mukul ula ong ba kane ka jinglong jingman kam wanrah satia ia ka jingbha ia ka Meghalaya.
U Mukul ula kyntu ban long kiba jai jai noh bad ban nym shim ia ka jingjia ba 19 tarik kum ka jingiakynad pher jaidbynriew tang namar ka jingbym lah ka Sorkar ban shim lypa ia ki sienjam ban khanglad.
